ມສ. ວຽງຈັນ, ແສງແຫ່ງຊີວິດ ແລະເງົາແຫ່ງຄວາມຊົງຈຳ

ຖ້າຖາມເຖີງ ໄລຍະເວລາທີ່ດີທີ່ສຸດໃນຊີວິດຂອງແຕ່ລະຄົນ, ໄລຍະເວລາທີ່ສ້າງຄວາມປະທັບໃຈ ແລະ ເກີດຄວາມສຸກ ທຸກຄັ້ງ ໃນເວລາທີ່ຄິດຮອດ ນັ້ນ, ຄໍາຕອບທີ່ມັກຈະໄດ້ຍິນ ເປັນປະຈໍາ ກໍ່ຄື “ໄລຍະເວລາທີ່ເປັນນັກຮຽນມັດທະຍົມ”, ຂໍພຽງແຕ່ໄດ້ກ້າວຂາເຂົ້າໄປໃນໂຮງຮຽນເກົ່າ, ສໍາຜັດຫ້ອງຮຽນເກົ່າທີ່ຕົນເຄີຍ ຮ່ວມຮຽນກັບບັນດາໝູ່ຄູ່ທີ່ຮັກແພງ ແລະ ກັບມານັ່ງໃນຈຸດໜື່ງຂອງໂຮງຮຽນ ທີ່ຕົນເຄີຍໃຊ້ເປັນມຸມສະຫງົບ ເພື່ອຄິດ, ທົບທວນ ແລະ ແລກປ່ຽນປະສົບການກັບບັນດາສະຫາຍຮັກ, ພຽງເທົ່ານັ້ນ ສີສັນຂອງອາດີດໃນເມື່ອກ່ອນ ແລະ ຄວາມອາໄລຫາຄວາມຮູ້ສຶກທີ່ດີເຫຼົ່ານັ້ນ ກໍ່ຈະຖຶກເອີ້ນກັບຄືນມາອີກຄັ້ງ ຢ່າງບໍ່ມີໃຜສາມາດປະຕິເສດໄດ້.

 

ບໍ່ວ່າຈະຢູ່ໃນຍຸກສະໄໝໃດສໍາລັບຄົນລາວເຮົາແລ້ວ, ໂຮງຮຽນ ກໍ່ຍັງເປັນສະຖານທີ່ ທີ່ເຕັມໄປດ້ວຍຄຸນຄ່າທາງຈິດໃຈ ແລະ ເປັນສະຖາບັນແຫ່ງການຮຽນຮູ້ ທີ່ສ້າງຄວາມປະທັບໃຈໃຫ້ແກ່ ຫຼາຍຮຸ້ນຄົນຢ່າງບໍ່ມີມື້ສິ້ນສຸດ, ໜຶ່ງໃນນັ້ນ ກໍ່ຄືໂຮງຮຽນມັດທະຍົມສົມບູນວຽງຈັນ ຫລືທີ່ສະໄຫມກ່ອນເພິ່ນຮຽກກັນວ່າ Lycée de Vientiane, ເປັນສະຖາບັນການສຶກສາອັນດັບຕົ້ນໆຂອງປະເທດ ທີ່ສະທ້ອນສີສັນແຫ່ງຊິວິດເດັກມັດທະຍົມລາວ ໄດ້ຢ່າງໜ້າສົນໃຈ, ສະໜອງຄວາມຮູ້ຄວາມສາມາດທີ່ທັນສະໄໝ ແລະ ເສີມສ້າງປະສົບການຊີວິດ ແກ່ນັກຮຽນ, ພາຍໃຕ້ບັນຍາກາດຄວາມອົບອຸ່ນຂອງ ອາຄານສະຖານທີ່; ການຈັດວາງແຜນຜັງຂອງໂຮງຮຽນທີ່ມີລະບຽບແບບແຜນ ຮອງຮັບເອົາຄວາມຮົ່ມເຢັນຂອງສະພາບແວດລ້ອມທາງທໍາມະຊາດໄດ້ເປັນຢ່າງດີ ຈຶ່ງເຮັດໃຫ້ໂຮງຮຽນມັດທະຍົມສົມບູນວຽງຈັນ ກາຍເປັນໂຮງຮຽນອັນດັບຕົ້ນໆຂອງປະເທດລາວທີ່ມີ ຄວາມສວຍງາມທາງດ້ານອາຄານສະຖານທີ່ ອັນເປັນເອກະລັກສະເພາະ ແລະ ເປັນໜ້າຕາຂອງໂຮງຮຽນສີຂຽວແຫ່ງນະຄອນຫຼວງວຽງຈັນຢ່າງແທ້ຈິງ.

 

ໂຮງຮຽນມັດທະຍົມສົມບູນວຽງຈັນ ສ້າງຂື້ນເມື່ອປີ 1956 (ທີ່ມີຊື່ເດີມວ່າໂຮງຮຽນ ປາວີ PAVI ເຊິ່ງຈາກການເລິ່ມກໍ່ຕັ້ງນັ້ນມີພຽງ 4ຫ້ອງຮຽນ ສຳລັບນັກຮຽນ 120 ຄົນເທົ່ານັ້ນ) ທີ່ມີການກໍ່ສ້າງຕຶກອາຄານເພິ່ມ ເພື່ອຮອງຮັບນັກຮຽນໃຫ້ໄດ້ຮອດ 2200 ຄົນ. ນະໃຈກາງນະຄອນຫລວງທ່າມກາງສະພາບແວດລ້ອມທີ່ເຕັມໄປດ້ວຍສີຂຽວໃນເວລານັ້ນ ໂຮງຮຽນມັດທະທະຍົມສົມບູນວຽງຈັນ ຈຶ່ງເປັນສະຖານທີ່ສວຍງາມຈາກສະຖາປັດຕະຍະກຳທີ່ສອດແຊກເຂົ້າໃນພື້ນທີ່ໄດ້ຢ່າງໂດດເດັ່ນ.

 

ເມື່ອເຮົາ ສອດສ່ອງຜ່ານດ້ານໜ້າຂອງໂຮງຮຽນ, ສິ່ງທໍາອິດທີ່ສາມາດດູດດຶງຄວາມສົນໃຈ ກໍ່ຄືຄວາມສະຫງ່າຂອງຕຶກສີຂາວນວນ ເຊິ່ງເປັນຕຶກວິຊາການຂອງໂຮງຮຽນ ທີ່ມີຄວາມເກົ່າແກ່ ແລະ ເປັນເອກະລັກສະເພາະ ໂດຍການນຳເອົາລັກສະນະສະຖາປັດຕະຍະກໍາແບບໂມເດີ້ນໃນຊຸມປີ1930 ມາໃຊ້, ຮູບຊົງຂອງຕຶກເປັນຕຶກສອງຊັ້ນ ເປັນຮູບຊົງທາງຍາວເພື່ອເປັນດັ່ງປະຕູໜາທີ່ແຍກເຂດ ຂອງສາທາລະນະ ແລະສ່ວນຕົວ ແຕ່ກໍ່ພ້ອມທີ່ຈະເຮັດໜ້າທີ່ເປັນດັ່ງປະຕູຕ້ອນຮັບ ນັກຮຽນເຂົ້າມາເພື່ອສຶກສາຮ່ຳຮຽນ. ດ້ວຍຮູບຂົງເລຂາຄະນິດ ທີ່ມີເສັ້ນຊື່ເປັນຫລັກ ສື່ເຖິງຄວາມເຂັ້ມງວດຂອງສະຖານທີ່ຕາມລັກສະນະອາຄານທາງລັດຖະການ ແຕ່ຄວາມແຂງກະດ້າງເຫລົ່ານັ້ນກໍ່ໄດ້ຖືກລົດທອນລົງດ້ວຍ ການສ້າງຮູບແບບຂອງຝາດ້ານໜ້າອາຄານບໍລິເວນກາໝາຍໂຮງຮຽນ ໃຫ້ມີລັກສະນະຂອງຝາທີ່ເປັນປ່ອງຊ້ຳໆກັນເພື່ອນຳເອົາແສງແດດ ເຂົ້າມາໃນພື້ນທີ່ ນອກຈາກຈະໃຫ້ຄວາມຮູ້ສືກອ່ອນນຸ້ມລົງ ເມື່ອແສງຈາກທຳມະຊາດສ່ອງຜ່ານແລ້ວ ຝາດັ່ງກ່າວຍັງປຽບເໝືອນຕົວກັ່ນຕ້ອງບໍ່ໃຫ້ແສງແດດກະທົບເຂົ້າສູ່ຕຶກຫຼາຍເກີນໄປ, ເຮັດໃຫ້ອາກາດພາຍໃນຕຶກເກີດການຖ່າຍເທ ທັງໝົດນີ້ຈຶ່ງເປັນດັ່ງສີລະປະຂອງເງົາສະທ້ອນ.

 

ເນື່ອງຈາກຂໍ້ດີຂອງອົງປະກອບທາງດ້ານພື້ນທີ່ໂຮງຮຽນອັນກ້ວາງຂວາງ ແລະ ຈຸດພິເສດຂອງໂຮງຮຽນທີ່ເນັ້ນ ການສ້າງພື້ນທີ່ສີຂຽວທີ່ຕືບໜາ, ຈຶ່ງເຮັດໃຫ້ການສະແດງພາບຂອງບັນດາອາຄານຕ່າງໆ ພາຍໃນໂຮງຮຽນ ມີລັກສະນະທີ່ພົ້ນເດັ່ນ, ສະຫງ່າ ແລະ ມີຄວາມກົມກືນກັບສະພາບແວດລ້ອມພາຍໃນໂຮງຮຽນ. ສັງເກດໄດ້ຈາກການວາງຈຸດທີ່ຕັ້ງຂອງແຕ່ລະອາຄານລ້ວນແລ້ວແຕ່ມີຕົ້ນໄມ້ໃຫຍ່ເປັນ ອົງປະກອບແວດລ້ອມ ເສີມໃນການສ້າງຄວາມໂດດເດັ່ນໃຫ້ແກ່ສີຂອງອາຄານ. ເມື່ອແສງແດດກະທົບໃສ່ບໍລິເວນຂອບເຂດຂອງໂຮງຮຽນ ກໍ່ຈະໄດ້ຄວາມຕຶບໜາຂອງບັນດາຕົ້ນໄມ້ໃຫຍ່ ເປັນຕົວຊ່ວຍໃນການຄວບຄຸມການກະທົບຂອງແສງສູ່ອາຄານໄດ້ຢ່າງສົມດູນ, ເຮັດໃຫ້ອາກາດພາຍໃນບໍລິເວນໂຮງຮຽນ ແລະ ຕາມອາຄານຮຽນບໍ່ຮ້ອນຈົນເກີນໄປ ພ້ອມທັງມີລົມລ່ວງຢ່າງສະໝໍ່າສະເໝີ.

 

ບໍ່ວ່າທ່ານຈະຍ່າງຜ່ານອາຄານໃດ ຫຼື ມຸມໃດໃນຂອງອານາບໍລິເວນຂອງໂຮງຮຽນ ບັນດາພາບແຫ່ງຄວາມຫຼັງ, ເຫດການທີ່ເຄີຍເກີດຂື້ນໃນສະໄໝເປັນນັກຮຽນ ແລະ ບັນດາຄວາມຮູ້ສຶກດີໆທີ່ມີໃນເມື່ອກ່ອນນັ້ນ ກໍ່ຈະເຂົ້າມາຕື່ມເຕັມ ໃນທຸກໆບ່ອນຂອງຄວາມຄິດຂອງຜູ້ພົບເຫັນ ປຽບດັ່ງຄໍາອະທິບາຍກ້ອງຮູບພາບຂອງແຕ່ລະສະຖານທີ່ ແຕ່ລະສິ່ງພາຍໃນໂຮງຮຽນແຫ່ງນີ້ ເຮັດໃຫ້ຫວນຄືນ ເຖິງຄວາມຜູກພັນ, ມິດຕະພາບ ແລະ ບັນຍາກາດອັນແສນອົບອຸ່ນພາຍໃຕ້ສາຍຄາຂອງໂຮງຮຽນທີ່ສວຍສົດງົດງາມ ຍິ່ງ ເພີ່ມທະວີຄວາມຄິດຮອດຄິດເຖິງຢູ່ສະເໝີ.

 

ໂຮງຮຽນມັດທະຍົມສົມບູນວຽງຈັນ ສໍາລັບບັນດາສິດເກົ່າ ແລະ ນັກຮຽນໃນປະຈຸບັນແລ້ວ, ສະຖານທີ່ນີ້ບໍ່ ພຽງແຕ່ເປັນແຫລ່ງສະໜອງຄວາມຮູ້ ກ່ອນການກ້າວໄປສູ່ອານາຄົດຕາມ ຄວາມຝັນ ໃນພາຍພາກໜ້າເທົ່ານັ້ນ, ແຕ່ສໍາລັບພວກເຮົາສະຖານທີ່ນີຄື ບ້ານ, ຄືບ່ອນສະແຫວງຫາຕົວຕົນ ໂດຍຜ່ານການຮຽນຮູ້ຈາກຄອບຄົວໃຫຍ່ທີ່ປະກອບດ້ວຍບັນດາຄູອາຈານ, ອ້າຍເອື້ອຍນ້ອງ ແລະ ໝູ່ເພື່ອນສະຫານ ຜູ້ທີ່ພ້ອມຈະເປັນແວ່ນແຍງອັນດີ, ສະຫນອງບົດຮຽນອັນລໍ້າຄ່າມອບ ເປັນຂອງຂວັນອັນປະເສິດໃນການຮຽນຮູ້ຊິວິດ ເພື່ອກ້າວໄປສູ່ການກຽມພ້ອມໃນການຢູ່ຮ່ວມກັບສັງຄົມອື່ນໆທີ່ໃຫຍ່ຂື້ນຕໍ່ໆໄປ.

Before Lines 4

Before Lines 1

Before Lines 12

Before Lines 9

Before Lines 7

Before Lines 3

Before Lines 11

Before Lines 6Before Lines 5

Before Lines 2Before Lines 10