04

ມະຫັດສະຈັນບໍ່ແກ້ວ ອັນຍະມະນີແຫ່ງແມ່ນໍ້າຂອງທີ່ແທ້ຈິງ

ປັດຈຸບັນສັງຄົມໃນເມືອງເຮົາຫັນໄປທາງໃດເຕັມໄປດ້ວຍການແຂ່ງຂັນ ບໍ່ວ່າຈະແຂ່ງກັບເວລາ ຫຼື ແຂ່ງກັບຄູ່ແຂ່ງໃນສາຍອາຊີບຂອງຕົນປຽບດັ່ງໜູທີ່ແລ່ນໃນວົງລໍ້ບໍ່ມີທີ່ສິ້ນສຸດ. ການເຮັດວຽກໜັກເກີນໄປນຳສູ່ປັນຫາຮ້າຍແຮງທາງດ້ານສຸຂະພາບ ດັ້ງນັ້ນ,ເພື່ອຫຼຸດຜ່ອນຄວາມສ່ຽງດັ່ງກ່າວທາງອອກທີ່ດີທີ່ສຸດຄື “ການພັກຜ່ອນ”. ມື້້ນີ້ເຮົາຈະນຳສະເໜີສະຖານທີ່ທ່ອງທ່ຽວທີ່ເໝາະແກ່ການພັກຜ່ອນຢ່ອນໃຈ, ທີ່ສຳຄັນບໍ່ຕ້ອງໄປໄກຮອດຕ່າງແດນ ໃນລາວເອງກໍມີດີບໍ່ນ້ອຍຫນ້າຊາດອື່ນໂດຍສະເພາະ “ແຂວງບໍ່ແກ້ວ”.

ຖ້າຖາມເຖິງແຫຼ່ງທອງທ່ຽວທີ່ເດັ່ນໃນແຂວງບໍ່ແກ້ວສິ່ງທຳອິດທີ່ຫຼາຍຄົນອາດຈະຕອບວ່າ “ເຂດເສດຖະກິດພິເສດສາມຫຼ່ຽມທອງຄຳ” ແຕ່ໃນແຂວງນິ້ມີສະຖານທີ່ທ່ອງທ່ຽວທາງທໍາມະຊາດທີ່ອຸດົມສົມບູນທີ່ໜ້ອຍຄົນຈະຮູ້. ໜື່ງໃນນັ້ນແມ່ນ    “ປ່າສະຫງວນແຫ່ງຊາດນໍ້າການ”. ຂ້າພະເຈົ້າຈະນຳສະເໜີສະຖານທີ່ແຫ່ງນີ້ໃຫ້ທຸກຄົນຮັບຮູ້ເພື່ອພິສູດນຳກັນວ່າ ເມືອງລາວສວຍງາມຮັງມີແທ້ບໍ່?

ເປັນຫຍັງຕ້ອງໄປປ່າສະຫງວນແຫ່ງຊາດນໍ້າການ?

ມັນເປັນໜຶ່ງໃນ 24 ປ່າສະຫງວນແຫ່ງຊາດຂອງປະເທດລາວ ແລະ ເປັນພຽງໜື່ງດຽວໃນແຂວງບໍ່ແກ້ວ. ຕັ້ງແຕ່ໃດມາປ່າສະຫງວນແຫ່ງນີ້ເປັນຖິ່ນທີ່ຢູອາໄສໃຫ້ແກ່ສັດຫາຍາກເຊັ່ນ: ເສືອ, ໝີດຳ, ທະນີ ແລະ ອື່ນໆ. ເພາະເຫດນີ້ເຮົາສາມາດເວົ້າໄດ້ວ່າປ່າສະຫງວນນໍ້າການເປັນສົມບັດອັນລໍ້າຄ່າທີ່ທຳມະຊາດສ້າງຂື້ນເທິງດິນແດນລ້ານຊ້າງແຫ່ງນີ້.

ນອກຈາກຊື່ນຊົມຄວາມອຸດົມສົມບູນຂອງປ່າສະຫງວນແຫ່ງນີ້ແລ້ວ, ສະຖານທີ່ແຫ່ງນີ້ຍັງເປັນສະຫວັນຂອງຜູ້ຮັກຄວາມທ້າທ້າຍ ດ້ວຍບ້ານພັກທີ່ໂດດເດັ່ນບໍ່ຄືບ່ອນໃດໃນໂລກ “ບ້ານເທີງຕົ້ນໄມ້ທີ່ສູງທີ່ສຸດໃນໂລກ”. ຕັ້ງຢູ່ເທິງຕົ້ນໄມ້ທີ່ສູງປະມານ 40 ແມັດ ໂດດດ່ຽວກາງປ່າ. ທ່ານສາມາດຈິບກາເຟຫອມໆໃນຂະນະທີ່ຊົມວິວຂອງທຳມະຊາດທີ່ຂຽວສົດງົດງາມກາງເວຫາ ຄິດພາບແລ້ວໃຈສັ່ນທັນທີ (ເປັນຜົນທັງຈາກຄາເຟອິນ ແລະ ຄວາມສູງຂອງບ້ານ). ເຖິງຈະຢູ່ກາງປ່າກໍຕາມ ແຕ່ທີ່ພັກຈັດຫາສິ່ງອຳນວຍຄວາມສະດວກທີ່ຈຳເປັນໃຫ້ທ່ານທັງ ເຄື່ອງໃຊ້ໄຟຟ້າທີ່ຈຳເປັນ ແລະ ຫ້ອງນໍ້າສະອາດ.

ພັກຜ່ອນຢູ່ສະຖານທີ່ແຫ່ງນີ້ເປັນໂອກາດດີທີ່ຈະໄດ້ໃກ້ຊິດກັບທະນີ. ຖ້າໂຊກດີຈະໄດ້ເຫັນຄອບຄົວທະນີເກາະເທິງຕົ້ນໄມ້. ໃນຍາມເຊົ້າເຮົາຈະໄດ້ຍິນສຽງໂຫຍຫວນຂອງທະນີໃນຂະນະທີ່ຢູ່ໃນເມືອງໄດ້ຍິນແຕ່ສຽງແກລົດ. ການອາໄສຢູ່ບ້ານຕົ້ນໄມ້ກໍຄືເຮົາສວມບົດບາດເປັນທະນີ ມັນເປັນປະສົບການດີໆທີ່ເຮັດໃຫ້ເຮົາໄດ້ຮູ້ເຖິງວິຖີຊີວິດຂອງບັນພະບູລຸດເຮົາກ່ອນການວິວັດທະນາການ.

ຍັງບໍ່ພຽງເທົານັ້ນສະຖານທີ່ແຫ່ງນີ້ຍັງເອົາໃຈນັກຜະຈົນໄພຜູ້ມັກຄວາມຕື່ນເຕັ້ນ ດ້ວຍກິດຈະກຳສຸດຫວາດສຽວກັບການໂຫນເຊືອກສະລິງຄວາມຍາວກ່ວາ 500 ແມັດ ຜ່ານຫຸບເຂົາສູງ. ເປັນການສ້າງຄວາມທ້າທາຍທີ່ປຸກໃຈໃຫ້ທຸກຄົນກ້າວຂ້າມຂີດຈຳກັດຂອງຕົນ ຫຼັງຈາກໄດ້ລອງແລ້ວທ່ານຈະຄົ້ນພົບຄວາມກ້າທີ່ເຊື່ອງຢູ່ໃນຕົວທ່ານ. ຖ້າໄປກັບກຸ່ມເພື່ອນສະໜິດຈະເພີ່ມທະວີຄວາມມ່ວນຕື່ມອີກ ແລະ ຈະໄດ້ບັນທຶກຊ່ວງເວລາດີໆນີ້ໃນຄວາມຊົງຈຳ. ບໍ່ມີຫຍັງຄຸ້ມຄ່າກ່ວາການໄປປ່າສະຫງວນແຫ່ງຊາດນໍ້າການອີກແລ້ວ ຄັ້ງໜຶ່ງໃນຊີວິດຕ້ອງໄປເຫັນກັບຕາ ແລະ ສຳຜັດດ້ວຍຫົວໃຈ ແລ້ວທ່ານຈະຄົ້ນພົບຄຳຕອບທີ່ຂ້າພະເຈົ້າໄດ້ຖາມໄວ້ວ່າ ເມືອງລາວສວຍງາມຮັ່ງມີແທ້ບໍ່?

ຄຸນຄ່າຂອງການທ່ອງທຽວບໍ່ໄດ້ຂື້ນກັບລາຄາຂອງຫ້ອງພັກ ຫຼື ຄວາມຫຼູຫຼາຂອງອາຫານ ແຕ່ແມ່ນມິດຕະພາບຂອງເພື່ອນຮ່ວມທາງ ແລະ ບົດຮຽນທີ່ໄດ້ຈາກການທ່ອງທ່ຽວ. ການອອກໄປທ່ຽວຊົມສະຖານທີ່ິ່ໃໝ່ໆເປັນການສ້າງແຮງບັນດານໃຈໃນການໃຊ້ຊີວິດຂອງເຮົາ. ສຸດທ້າຍນີ້, ຜູ້ຂຽນຢາກສະນັບສະໜູນໃຫ້ທຸກທ່ານທ່ຽວພາຍໃນປະເທດເຮົາໃຫ້ທົ່ວແລ້ວທ່ານຈະພູມໃຈທີ່ໄດ້ເກີດໃນດິນແດນແຫ່ງນີ້, ທີ່ສໍາຄັນຕ້ອງເລີ່ມຕົ້ນຈາກ “ປ່າສະຫງວນແຫ່ງຊາດນໍ້າການ” ແລ້ວທ່ານຈະປະທັບໃຈກັບອັນຍະມະນີຂອງແມ່ນໍ້າຂອງທີ່ແທ້ຈິງ.

0307

0506

04

02


ບົດເລື່ອງໂດຍ : ທ້າວ ກໍລະເກດ ຕັນເສລີ

ສະຖານທີ່ : ປ່າສະຫງວນແຫ່ງຊາດ, ເມືອງຫ້ວຍຊາຍ, ແຂວງບໍ່ແກ້ວ

ແຫຼ່ງຂໍ້ມູນ

Lonely planet

ຮູບຈາກ

www.gibbonexperience.org

http://www.vietnamtravelto.com/tag/things-to-do-in-laos/