ອະນຸສອນສະຖານ ປະທານ ໄກສອນ ພົມວິຫານ ສະທ້ອນເຖິງ ມຸມຊີວິດທີ່ລຽບງ່າຍ ຂອງຕຳນານວິຣະບູຣຸດ

ສະຖາປັດຕະຍະກຳພາຍນອກທີ່ບໍ່ໂດດເດັ່ນ ເປັນອາຄານຊັ້ນດຽວ ມຸງຫລັງຄາຊົງຕ່ຳ ມີຮູບລັກສະນະລຽບງ່າຍຕາມຮູບແບບເຮືອນອາເມຣິກາ ຖືກສ້າງຂຶ້ນໃນສະໄໝກ່ອນປົດປ່ອຍ ໂດຍອອກແບບໃຫ້ເປັນທີ່ພັກຮອງຮັບໃຫ້ກັບຄອບຄົວນາຍທະຫານອາເມຣິກາ ໃນຄ້າຍທະຫານຫລັກ 6, ເຊິ່ງພາຍຫລັງທີ່ປະເທດຊາດໄດ້ຮັບການປະກາດເອກະລາດ ເຂດເຮືອນນີ້ຖືກປັບປ່ຽນໝູນໃຊ້ໃຫ້ກາຍມາເປັນບ່ອນປະຈຳການຂອງອະດີດປະທານໄກສອນພົມວິຫານ, ຜູ້ນຳທີ່ແສນເຄົາລົບຮັກຂອງປວງຊົນລາວ ແລະໄດ້ຖືກປັບປຸງຟື້ນຟູກັບຄືນມາໃໝ່ອີກຄັ້ງໃຫ້ເປັນອະນຸສອນສະຖານ ປະທານໄກສອນ ພົມວິຫານ ໃນວັນທີ 13 ທັນວາ 1994 ກົງກັບວັນຄ້າຍວັນເກີດຂອງທ່ານຄົບຮອບ 74 ປີ, ໂດຍໄດ້ມີການເກັບຮັກສາສະພາບຂອງອາຄານຕະຫຼອດເຖິງສິ່ງຂອງເຄື່ອງໃຊ້ສ່ວນຕົວຂອງທ່ານ ເຊິ່ງສິ່ງເຫລົ່ານີ້ເຮັດໃຫ້ຜູ້ເຂົ້າມາຢ້ຽມຊົມໄດ້ສຳຜັດກິ່ນອາຍ ທີ່ບອກໄດ້ເຖິງເລື່ອງລາວທີ່ເກີດຂຶ້ນ ໃນທຸກບາດກ້າວການດຳເນີນຊີວິດຂອງອະດີດທ່ານປະທານໄກສອນຢ່າງໃກ້ຊິດ ຄືກັບວ່າໄດ້ຫວນຍ້ອນອະດີດໄປເຫັນພາບຕອນທີ່ເພິ່ນຍັງມີຊີວິດຢູ່…