Lines Online

ເກີບໂບກ ຫົນທາງ ແລະ ຈຸດໝາຍ

19181731_1558827794140954_319837087_o

ບໍ່ດີພໍ ແຕ່ພໍດີ

ຖ້າເຈົ້າຖືກຖາມວ່າ ຢາກໄດ້ຫຍັງທີ່ສຸດ, ເຈົ້າກໍ່ຈະຕ້ອງຕອບ ໃນສິ່ງທີ່ເຈົ້າຢາກໄດ້ຫລາຍທີ່ສຸດຂະນະນັ້ນ ໂດຍທີ່ບາງຄັ້ງຍັງບໍ່ຮູ້ຊໍ້າວ່າ ຂອງສິ່ງນັ້ນຈຳເປັນກັບຊີວິດນະຕອນນັ້ນຫລືບໍ. ຂ້ອຍກໍ່ຍອມຮັບວ່າຂ້ອຍຄົນຫນື່ງທີ່ເປັນແບບນັ້ນ ຖ້າຢູ່ດີໆ ມີຄົນຖາມວ່າ ຢາກໄດ້ຫຍັງ ຂ້ອຍກໍ່ອາດຈະຕອບວ່າ ເງີນຈັກຫີບຫນຶ່ງ ທີ່ສະກຸນເງີນເປັນເງີນ ໂດລາ (ງ່າຍດີ ຢາກໄດ້ຫຍັງຄ່ອຍໄປຊື້ເອົານຳຫລັງ). ແຕ່… ມັນຈະມີຄຳວ່າແຕ່ ຖ້າຊີວິດມັນເລີ່ມຢາກເປີດແງ່ມຸມການເບິ່ງໂລກໃຫ້ກັບເຮົາ. ມື້ກ່ອນ ຂ້ອຍຕ້ອງລົງໄປສຳຫລວດພື້ນທີ່ບຳບັດຂີ້ເຫຍື້ອ ໃນມື້ທີ່ຝົນຫາກໍ່ຢຸດຕົກ ຈິນຕະນາການວ່າ ເປັນພື້ນທີ່ທີ່ຂີ້ເຫຍື້ອໝົດນະຄອນຫລວງມາລວມໂຕກັນ ທາງດິນແດງ ເພື່ອຈະເຂົ້າໄປໃນພື້ນທີ່ເພື່ອສຳຫລວດ ແລະຕອນນັ້ນເຈົ້າຍ່າງມາຖາມວ່າ ຢາກໄດ້ຫຍັງ ຄຳຕອບມີຄຳດຽວເລີຍ “ເກີບໂບກ” ມັນຄືເກີບຢາງສີດຳ ຄໍສູງໆແນ່ ລາຄາ 25000 ກີບ. ພາຍໃຕ້ເກີບໂບກຂະຫນາດໃຫຍ່ກວ່າຕີນຫນ້ອຍຫນຶ່ງ ພາຂ້ອຍໄປທຸກໆພຶ້ນທີ່ ທີ່ຕ້ອງການໂດຍທີ່ບໍ່ຫ່ວງວ່າຈະຫລົ່ມ ຫລືຕີນຈະເປື້ອນ ພໍສີ້ນສຸດການສຳຫລວດ ເກີບໂບກສີດຳ ໃນຂະນະນີ້ ເຕັມໄປດ້ວຍສີດິນແລະຂີ້ຕົມ. ນັ່ງແນມເບິ່ງມັນ ແລະຂອບໃຈວ່າ ຖ້າບໍ່ມີມັນ ການມາສຳຫລວດເທື່ອນີ້ຄືຊິເສຍຖ້ຽວ.. ແຕ່ດ້ວຍຕົວຊ່ວຍທີ່ມະນຸດປະດິດຂຶ້ນ ການລຸຍຂີ້ຕົມມັນຈະບໍ່ເປັນເລື່ອງຍາກອີກຕໍ່ໄປ ເຮົາປຽບທຽບກັບຊີວິດເຮົາ ຫລາຍຄັ້ງເຮົາຄິດວ່າ ເຮົາຕ້ອງຫາສິ່ງທີ່ດີທີ່ສຸດໃຫ້ໂຕເອງ ແລະຫລາຍໆຄັ້ງເຮົາເລືອກເອົາສີ່ງທີ່ດີທີ່ສຸດຂອງຄົນອື່ນມາເປັນໂຕຕັ້ງ ເຊິ່ງມັນຈະເຮັດການໃຊ້ຊີວິດຂອງເຮົາລຳບາກແຮງ ເພາະສິ່ງທີ່ດີ ສີ່ງນັ້ນບາງຄັ້ງ ກັບເຮົາມັນໄຮ້ຄ່າກໍ່ເປັນໄປໄດ້ ເພາະມັນອາດຈະບໍ່ໄດ້ຈຳເປັນເລີຍ ເພາະສະນັ້ນແລ້ວ ຂອງທີ່ຢາກໄດ້ແລະມັນຈະດີທີ່ສຸດສຳລັບເຮົາ ແມ່ນມັນຕ້ອງ ເຊີວິສ ໃຫ້ເຮົາໄປຮອດຈຸດຫມາຍໄດ້ນຳ. ງ່າຍແຮງ ມື້ນີ້ຝົນຕົກ ຕ້ອງອອກໄປນອກ ຄັນຮົ່ມຄືສິ່ງຈຳເປັນ (ຖ້າຢາກໄປຮອດທີ່ຫມານແບບໂຕແຫ້ງໆໄດ໋ເດີ), ເມື່ອຍ ຮ່າງກາຍຕ້ອງການນຳ້ ກໍ່ພຽງແຕ່ຕື່ມນຳ້ ຕອນນັ້ນໄຂ່ປາຄາເວຍ ກໍ່ບໍ່ຕ້ອງການ. ບາງຄັ້ງຄຳຕອບຂອງຄຳຖາມ ມັນງ່າຍຫລາຍ ພຽງແຕ່ທ່ານຮູ້ແລະເຂົ້າໃຈເຖິງສະຖານະການທີ່ທ່ານປະເຊີນຢູ່ ເຈົ້າຈະສາມາດເລືອກສິ່ງພໍດີໃຫ້ໂຕເອງໄດ້. ຂອງບາງຢ່າງ ມັນດີ ແຕ່ບາງທີມັນໃຊ້ບໍ່ຖືກສະຖານະການ ມັນກໍ່ເອີ້ນໄດ້ວ່າໄຮ້ຄ່າ. ສະນັ້ນແລ້ວ ການທີ່ຕອນນີ້ ຊີວິດຂອງທ່ານຄືກັບວ່າກຳລັງຍ່າງຢູ່ເທິງເສັ້ນທາງທີ່ມີແຕ່ຂີ້ຕົມ ລອງຖອດເກີບສົ້ນສູງ ຫລືເກີບຫນັງລາຄາແພງອອກ ແລ້ວຫາເກີບໂບກທີ່ພໍດີກັບຕີນມາໃສ່ ທ່ານອາດຈະຍ່າງໄດ້ຄ່ອງແຄ້ວຂຶ້ນ. ຊີວິດມັນບໍ່ໄດ້ມີທາງລັດໃຫ້ກັບທຸກຄົນດອກ ເລືອກຕົວຊ່ວຍໃນການເດີນທາງທີ່ເຫມາະກັບສະພາບເສັ້ນທາງຊີວິດຂອງເຮົາດີກວ່າ ອີ່ຫຍັງອາດຈະງ່າຍຂຶ້ນ. “ເປັນອີກຫນຶ່ງຄັ້ງ ທີ່ສິ່ງຂອງທຳມະດາ ມອບວີທີ່ຄິດອັນສ້າງສັນໃຫ້ກັບເຮົາ ແລະມັນປັບໃຊ້ໄດ້ຈິງ”

19024810_1558827790807621_1425949664_o