Untitled-1

ເຮືອນ ຕາມ ໃຈ ຂອງທ່ານ ອິນທິ ເດືອນສະຫວັນ ເຈົ້າຂອງອິນທິຣາກຣຸບ ເພາະຊີວິດມີຄວາມຫລາກຫລາຍ ເຮືອນຈຶ່ງຕ້ອງການຄວາມລຽບງ່າຍ

ບົດຄວາມໂດຍ: ຈັນດາ, ພຸດທະລັກ

ພາບຖ່າຍໂດຍ: Andrew

1

 15

“ດ້ວຍຄວາມທີ່ເປັນນັກທຸລະກິດທີ່ດຳເນີນກິດຈະການດ້ານການໃຫ້ບໍລິການທີ່ມີທັງຮ້ານ ອາຫານຫລາຍແຫ່ງ ແລະ ບໍລິສັດທ່ອງທ່ຽວໃນຮູບແບບພະຈົນໄພແບບອະນຸຮັກ ບໍ່ວ່າຈະເປັນ ການເດີນປ່າ, ການປີນໜ້າຜາ, ການລ່ອງເຮືອ…  ຊີວິດປະຈຳວັນສ່ວນໃຫຍ່ ຈຶ່ງຕິດພັນກັບການເດີນທາງລົງພື້ນທີ່ ອອກຕ່າງແຂວງ ຕາມເຂດຊຸມຊົນ, ຊົນນະບົດຈົນ ເຖິງການເດີນທາງເຂົ້າໄປໃນປ່າເພື່ອ ສຳຫລວດ-ບຸກເບີກເສັ້ນທາງການ ທ່ອງທ່່ຽວໃໝ່ໆ,  ເວົ້າໄດ້ວ່າຊີວິດສ່ວນຫລາຍແມ່ນຢູ່ນອກເຮືອນ  ໂອກາດທີ່ຈະໄດ້ຢູ່ເຮືອນແມ່ນມີໜ້ອຍ” ທ່ານ ອິນທີ ເດືອນສະຫວັນ ເລົ່າເຖິງ Life Style ຂອງຕົວເອງໃຫ້ຟັງ

 

16

“ຢາກໄດ້ເຮືອນທີ່ໂລ່ງໆໂປ່ງໆ ລຽບງ່າຍ ບໍ່ຕ້ອງມີລາຍລະອຽດຫຍັງຫລາຍ” ຄໍາຈໍາກັດຄວາມ ພຽງສັ້ນໆ ທີ່ເຈົ້າຂອງເຮືອນເອີ່ຍກັບທີມງານ ລາຍນ໌. ກ່ອນທີ່ຈະຄ່ອຍໆອະທິບາຍຕື່ມວ່າ “ໂດຍສ່ວນຕົວແລ້ວເປັນຄົນທີ່ ມັກຄວາມລຽບງ່າຍ ກົງໄປກົງມາ ບໍ່ຕ້ອງການຫຍັງທີ່ຊັບຊ້ອນ ຈຶ່ງເລືອກ Style ຂອງເຮືອນພັກສ່ວນຕົວ ເປັນແບບ Modern ຈຶ່ງຊອກຫາຕົວຢ່າງ ແລະ ແບບຮູບຕ່າງໆ ເພື່ອນຳໄປປຶກສາກັບສະຖາປະນິກ ຜູ້ອອກແບບ ເພື່ອໃຫ້ໄດ້ແບບທີ່ເພິ່ງພໍໃຈ ທີ່ສຸດ.”

ເຮືອນພັກສອງຊັ້ນ ຮູບຊົງສີ່ຫລ່ຽມແບບລຽບງ່າຍ ແຕ່ມີຄວາມໂດດເດັ່ນ ແລະ ທັນສະໄໝຕາມ ຮູບແບບສະຖາປັດຕະຍະກຳ Modern, ເຜີຍໃຫ້ເຫັນເນື້ອແທ້ຂອງວັດສະດຸທີ່ນຳໃຊ້ ບໍ່ວ່າຈະເປັນ ຝາປູນເປືອຍ; ຊຸ້ມປະຕູທາງເຂົ້າເຮືອນທີ່ເປັນໂຄງເຫລັກສີດຳ; ແຜ່ນຫິນທຳມະຊາດທີ່ໃຊ້ປະດັບຝາ ລວມໄປເຖິງຝາຮອບນອກ (ເປືອກອາຄານ) ແລະຊ່ອງເປີດຕ່າງໆທີ່ໃຊ້ແກ້ວເປັນວັດສະດຸຫລັກ ເຮັດໃຫ້ຮູ້ສຶກ ເຖິງຄວາມໂລ່ງສະບາຍຕາໄດ້ຕັ້ງແຕ່ຍັງບໍ່ທັນເຂົ້າໄປຢູ່ພາຍໃນຕົວເຮືອນ.

6

ສຳລັບການຕົກແຕ່ງພາຍໃນກໍ່ເນັ້ນທີ່ການສະແດງຜິວຂອງວັດສະດຸເປັນສ່ວນສຳຄັນ ທັງຝາສີຂາວລຽບ ຝາປູນເປືອຍ ແລະໃຊ້ຝາໄມ້ໂຊທີ່ສູງຕັ້ງແຕ່ພື້ນຊັ້ນລຸ່ມຈົນເຖິງລະດັບເພດານຊັ້ນສອງ ຊຶ່ງສາມາດແນມເຫັນ ໄດ້ຈາກຫລາຍໆຈຸດຂອງຕົວເຮືອນ ເປັນຕົວຊ່ວຍໃນການ            ຫລຸດຜ່ອນຄວາມແຂງກະດ້າງຂອງວັດສະດຸທີ່ກ່າວມາຂ້າງຕົ້ນ ແລະຍັງສາມາດຊ່ວຍເສີມໃຫ້       ບັນຍາກາດພາຍໃນເຮືອນເບິ່ງອົບອຸ່ນຂຶ້ນຕື່ມອີກດ້ວຍ, ເຄື່ອງຕົກແຕ່ງພາຍໃນເຮືອນປະກອບດ້ວຍງານສິລປະຫລາຍຊະນິດ ຫລາກຫລາຍສີສັນ ຊຶ່ງເປັນສ່ວນໜຶ່ງຂອງເຄື່ອງ ສະສົມຖືກຈັດວາງໃນມຸມຕ່າງໆພາຍໃນເຮືອນ ເຮັດໃຫ້ບັນຍາກາດສະເໝືອນຢູ່ໃນ ງານວາງສະແດງຜົນງານທາງສິລປະ ທີ່ພະນວກເຂົ້າກັນໄດ້ຢ່າງລົງໂຕກັບລາຍລະອຽດ ການອອກແບບສະໄຕລ໌ Modern ລວມເຖິງການອອກແບບຈັດວາງ ແລະ ເລືອກໃຊ້ ເຟີນິເຈີໄດ້ຢ່າງສວຍງາມ ລົງຕົວຕາມຮູບແບບ Minimalism Style.

ຕົວເຮືອນຈັດວາງໃຫ້ຂ້ອນໄປຢູ່ຕິດສ່ວນທ້າຍຂອງຕອນດິນຮູບສີ່ຫລ່ຽມຜືນຜ້າ, ໂດຍຈົ່ງພື້ນທີ່ສ່ວນໜ້າໄວ້ເປັນສວນ-ລານອະເນກປະສົງທີ່ອ້ອມຮອບດ້ວຍ Studio ງານສິລະປະຂອງຜູ້ເປັນນ້ອງສາວ, ໂຮງຈອດລົດ ແລະສ່ວນ ອອກກຳລັງກາຍນ້ອຍໆ. ຜັງເຮືອນຮູບຮ່າງຄ້າຍເລກສີ່ (4) ທີ່ມີສ່ວນທີ່ຍື່ນຍາວອອກເປັນທາງເຂົ້າເຮືອນຫລັກ ແລະໂຖງຮັບແຂກ, ໂດຍແບ່ງເຂດສ່ວນລວມ ແລະເຂດຫ້ອງນອນອອກເປັນສອງຟັ່ງໃນ ຊັ້ນລຸ່ມ, ໂຖງຫ້ອງຮັບແຂກທີ່ຢູ່ຖັດຈາກ ທາງເຂົ້າຫລັກຂອງເຮືອນເບິ່ງສູງໂປ່ງດ້ວຍ ໄອເດຍການເຮັດເພດານແບບ Double Space ບໍລິເວນນີ້ຈຶ່ງໂລ່ງ ແລະມີການ    ລະບາຍອາກາດທີ່ດີ ດ້ວຍຝາແກ້ວຂະໜາດໃຫຍ່ ແລະຊ່ອງເປີດບານກະທຸ້ງເພື່ອເປີດຮັບລົມ. ຍ່າງເລີກ ເຂົ້າໄປທາງດ້ານຫລັງແມ່ນຫ້ອງກິນເຂົ້າ ແລະຄົວສະໄໝໃໝ່ຖືກເຊື່ອມໂຍງ ການໃຊ້ງານໄວ້ຢ່າງຕໍ່ເນື່ອງ, ແຍກສ່ວນລະຫວ່າງຫ້ອງນີ້ ແລະ ໂຖງຮັບແຂກ ດ້ວຍຝາໂຊ ທີ່ເຮັດດ້ວຍໄມ້ທ່ອນ ແລະຝາແກ້ວເພື່ອຄວາມເປັນສັດສ່ວນຂອງແຕ່ລະພື້ນທີ່ ແຕ່ຍັງຄົງໄວ້ ດ້ວຍຄວາມຕໍ່ເນື່ອງທາງສາຍຕາ. ບານເປີດແກ້ວ ຂະໜາດໃຫຍ່ພາຍໃນຫ້ອງກິນເຂົ້າ ສາມາດເປີດກວ້າງ ເພື່ອເຊື່ອມຕໍ່ກັບບໍລິເວນສວນຫລັງບ້ານ ຊຶ່ງເປັນມຸມທີ່ ທ່ານ ອິນທີ ໃຊ້ງານຫລາຍມຸມໜຶ່ງຂະນະຢູ່ເຮືອນ.

17

15

8

ຊັ້ນສອງມີພຽງສອງຫ້ອງນອນໃຫຍ່ທີ່ແຍກກັນຢູ່ສອງຝັ່ງທີ່ເຊື່ອມຕໍ່ກັນດ້ວຍເຂດ ພັກຜ່ອນຄອບຄົວ, ຈຸດເດັ່ນຂອງບໍລິເວນນີ້ຄົງໜີບໍ່ພົ້ນສ່ວນນັ່ງຫລິ້ນທາງກາງທີ່ມີປະຕູບານເລື່ອນ ເປັນແກ້ວເຕັມຝາເປີດອອກສູ່ລະບຽງທີ່ແນບຂະໜານຢູ່ທັງສອງເບື້ອງ ເປັນບໍລິເວນທີ່ມີລົມພັດຜ່ານຕະຫລອດເວລາເມື່ອເປີດປະຕູອອກ ຈຶ່ງບໍ່ໜ້າແປກໃຈທີ່ມຸມນີ້ຈະເປັນອີກມຸມໜຶ່ງ ທີ່ເຈົ້າຂອງເຮືອນມັກໃຊ້ເປັນບ່ອນນັ່ງພັກຜ່ອນ. ເຂດພັກຜ່ອນຄອບຄົວນີ້ຖືກແບ່ງ ພື້ນທີ່ຍ່ອຍອອກເປັນຫລາຍສ່ວນ ເຊັ່ນ ສ່ວນນັ່ງຫລິ້ນ ສ່ວນຫລິ້ນເປຍໂນ ສ່ວນບັນເທີງ ແລະ ສ່ວນເຮັດວຽກບ້ານ ຂອງຜູ້ເປັນລູກສາວ ເວົ້າໄດ້ວ່າເປັນການຈັດສັນພື້ນທີ່ເພື່ອໃຫ້ສະມາຊິກພາຍໃນ ຄອບຄົວສາມາດຢູ່ໃນບໍລິເວນດຽວກັນໄດ້ຢ່າງພໍດີ ແລະມີແບບແຜນ   ເຖິງວ່າ ຈະເຮັດກິດຈະກຳທີ່ແຕກຕ່າງກັນກໍ່ຕາມ ແຕ່ສະມາຊິກພາຍໃນຄອບຄົວກໍ່ຍັງ ສາມາດໃຊ້ເວລາຢູ່ນຳກັນ ແລະມີປະຕິສຳພັນຮ່ວມກັນຫລາຍຂຶ້ນ.

“ສະຖາປະນິກໄດ້ວາງ Function ຂອງການໃຊ້ງານພາຍໃນເຮືອນໄວ້ ເຮັດໃຫ້ ພື້ນທີ່ ໃຊ້ງານຈຸດຕ່າງໆ ເຊື່ອມຕໍ່ກັນຢ່າງເລື່ອນໄຫລ ແລະໃຊ້ງານໄດ້ຢ່າງສະດວກ ພ້ອມນີ້ຍັງມີ Function ທີ່ສະຖາປະນິກອອກແບບ ເພື່ອສ້າງສະພາວະຢູ່ສະບາຍ ໄວ້ອີກດ້ວຍ ເຊັ່ນ ຄວາມໂປ່ງຂອງອາຄານ ການວາງຕຳແໜ່ງຂອງຊ່ອງເປີດ ຕ່າງໆ, ສ່ວນລາຍລະອຽດ ໃນການຕົກແຕ່ງແມ່ນອ້າຍເປັນຜູ້ຄຶດ-ອອກແບບ ແລະຄວບຄຸມ ການກໍ່ສ້າງດ້ວຍຕົວເອງ” ເຈົ້າຂອງເຮືອນເລົ່າເຖິງໄລຍະກໍ່ສ້າງໃຫ້ຟັງ, ຊຶ່ງຜົນທີ່ອອກມາກໍ່ເປັນທີ່ເພິ່ງພໍໃຈຫລາຍສຳລັບສະມາຊິກໃນຄອບຄົວ, ແຕ່ກໍ່ດ້ວຍຊ່ອງ ເປີດທີ່ມີຂະໜາດໃຫຍ່ ແລະ ໃຊ້ແກ້ວເປັນວັດສະດຸຫລັກ ຈຶ່ງມີບັນຫາກັບອຸນຫະພູມທີ່ຂ້ອນຂ້າງສູງ ໃນບາງລະດູການ ດ້ວຍວ່າ ແສງແດດທີ່ສາດສ່ອງເຂົ້າມາພາຍໃນຕົວເຮືອນຫລາຍຈົນເກີນໄປ.

ຄວາມໃສ່ໃຈ ແລະການມີສ່ວນຮ່ວມໃນ ການອອກແບບທຸກຂັ້ນຕອນຂອງຜູ້ເປັນ ເຈົ້າຂອງເຮືອນ ເຮັດໃຫ້ເຮືອນຫລັງນີ້ ກາຍເປັນສິ່ງທີ່ສະທ້ອນຕົວຕົນ ລົດນິຍົມ ຂອງຜູ້ເປັນເຈົ້າຂອງເຮືອນໄດ້ເປັນຢ່າງດີ, ດັ່ງມີຄົນ ເຄີຍກ່າວໄວ້ວ່າ “ການຈະທຳ ຄວາມເຂົ້າໃຈຄົນໆໜຶ່ງໄດ້ດີ ແມ່ນຕ້ອງ ສຶກສາຈາກເຮືອນຂອງຄົນໆນັ້ນ”.

2 3 4

6

7

8 9 10 11

12

13

14 15 16

17 20 21 26 25 24

23

27 32 30 28

29