່ຮຮ່ຮ

ເປີດບ້ານ ທ່ານສົມສະໜຸກມີໄຊ, Icon ວົງການສື່ຂອງລາວ ກັບຂອງສະສົມສ່ວນໂຕ

ເຄາະປະຕູເຮືອນ

ບັນຍາກາດທີ່ປ່ຽມໄປດ້ວຍຄວາມອົບອຸ່ນ ເປັນສິ່ງທຳອິດທີ່ໄດ້ສຳຜັດ ເມື່ອກ້າວຂາເຂົ້າໄປໃນເຮືອນສ່ວນຕົວຂອງ ທ່ານສົມສະໜຸກ ມີໄຊ, ຮອງປະທານ ສະມາຄົມນັກຂ່າວແຫ່ງປະເທດລາວ. ລາຍນ໌ສະໄຕລ໌ ສະບັບນີ້ໄດ້ຮັບການຕ້ອນຮັບຈາກ ຜູ້ທີ່ເປັນ Icon ຂອງວົງການຂ່າວສານ ສິລະປະ ແລະວັດທະນະທຳຂອງບ້ານເຮົາ. ນອກຈາກຈະໄດ້ຮັບກຽດໃຫ້ສຳພາດກ່ຽວກັບເສັ້ນທາງຂອງຊີວິດເພິ່ນແລ້ວ ເຮົາຍັງຈະໄດ້ສຳຜັດກັບຂອງສະສົມ ແລະຂອງຕົກແຕ່ງເຮືອນທີ່ເປັນໂຕແທນຂອງເລື່ອງລາວການເດີນທາງອັນຍາວນານຂອງຊີວິດເພິ່ນອີກດ້ວຍ.

ຈັບເຂົ່າສົນທະນາ

ຖ້າໃຫ້ເວົ້ານິຍາມຂອງການດຳລົງຊີວິດຂອງທ່ານ ມີແຊນ ສົມສະໜຸກ ມີໄຊ ກໍ່ຄົງຈະປຽບໄດ້ດັ່ງການເດີນທາງທີ່ຍາວນານ, ຕັ້ງແຕ່ອາຍຸ11ປີ ເພີ່ນເດີນທາງໄປສຶກສາທີ່ປະເທດ ຝລັ່ງ ຈົນຈົບການສຶກສາດ້ານມະນຸດວິທະຍາ ຈາກມະຫາວິທະຍາໄລ ຊ໊ອກບອນ (Université de Sorbonne) ເຊິ່ງເປັນມະຫາວິທະຍາໄລອັນດັບຕົ້ນໆຂອງປະເທດຝລັ່ງ. ຫລັງຈາກຈົບການສຶກສາແລ້ວ ທ່ານ ມີແຊນ ໄດ້ເລິ່ມອອກເດີນທາງໄປຕາມປະເທດຕ່າງໆດ້ວຍລົດ ກັບເພື່ອນຮັກດ້ວຍຄວາມມຸ່ງໝັ້ນທີ່ວ່າຈະເດີນທາງໃຫ້ອ້ອມໂລກ ຈົນມາຮອດປະເທດລາວ, ດິນແດນທີ່ເປັນບ້ານເກີດ ທີ່ໄດ້ຈາກໄປກວ່າ 20ປິ. ການເດີນທາງໄດ້ສິ້ນສຸດລົງທີ່ ນະຄອນຫລວງວຽງຈັນ, ເພິ່ນຕັດສິນໃຈເລີ່ມເຮັດວຽກ ຕາມຄວາມຮຽກຮ້ອງຂອງທາງລັດຖະບານໃນໄລຍະນັ້ນ ກໍ່ຄືການເປັນນັກຂ່າວ. ຈາກຈຸດນັ້ນ ການເດີນທາງໃນສາຍນັກຂ່າວຂອງເພິ່ນກໍ່ໄດ້ເລິ່ມຂື້ນ. ຈາກ Vientiane News ມາຮອດ Vientiane Times ໜັງສືພິມພາສາອັງກິດສະບັບທຳອິດຂອງລາວ, Le rénovateur ໜັງສຶພິມພາສາຝລັ່ງ ແລະນັກຂ່າວໜຸ່ມນ້ອຍໃນປັດຈຸບັນ ແລ້ວແຕ່ແມ່ນຜົນງານຂອງ ທ່ານ ສົມສະໜຸກ ມີໄຊ.

Linestyle

ແນ່ນອນວ່າ ຕະຫລອດການເດີນທາງສາຍອາຊີບ ທີ່ຮັບໃຊ້ປະເທດຊາດມາຫລາຍກວ່າ 40ປິນັ້ນ ໃນດ້ານຮູບແບບການດຳລົງຊີວິດຂອງເພິນກໍ່ຕ້ອງມາຄຽງຄູ່ກັນ ເຊັ່ນການອອກເດີນທາງໄປຊ່ວຍເຫລືອພີ່ນ້ອງປະຊາຊົນໃນເຂດຫ່າງໄກສອກຫລີກ ແລະກິດຈະກຳດ້ານວັດທະນະທຳຕ່າງໆ, ສະແດງໃຫ້ເຫັນເຖິງຄວາມມຸ່ງໝັ້ນທີ່ຕ້ອງການເຮັດປະໂຫຍດເພື່ອສັງຄົມຢ່າງແທ້ຈິງ. ເຫັນວ່າສິ່ງຕ່າງໆທີ່ເພິ່ນເຮັດມາຫລວງຫລາຍ ແລະລ້ວນແລ້ວແຕ່ເປັນເລື່ອງໃຫຍ່ໆນັ້ນ ທາງເຮົາເລີຍຕັ້ງຄຳຖາມວ່າ ເພິ່ນມີເວລາສ່ວນໂຕແນ່ຫລືບໍ, ເພິ່ນຕອບວ່າ ເວລາຫວ່າງໃນໄລຍະສັ້ນໆທີ່ມີ ແມ່ນການໃຊ້ເວລາໃນເຮືອນສ່ວນໂຕ ຂອງເພິ່ນເອງ. ຈາກເຮືອນພັກອາໄສ ໜຶ່ງຊັ້ນ ຂະໜາດກະທັດຮັດ ແລະມີສວນອ້ອມຮອບ ບົ່ງບອກວ່າເພິ່ນມີ Lifestyle ທີ່ລຽບງ່າຍ. ຕົ້ນໄມ້ໃນບໍລິເວນບ້ານ ແມ່ນທ່ານສົມສະໜຸກແມ່ນຜູ້ປູກເອງໂດຍການໃຊ້ເວລາໃນທ້າຍສັບປະດາ. ພາຍໃນເຮືອນຂອງເພິ່ນຈະເຫັນໄດ້ວ່າ ຝາທັງ4ດ້ານ ຈະມີປ່ອງເປີດຫລາຍເປັນພິເສດ ນັ້ນກໍ່ເພື່ອໃຫ້ໄດ້ຮັບອົງປະກອບຂອງພູມມີທັດດ້ານນອກທາງສາຍຕາ ໃຫ້ຫລາຍທີ່ສຸດ ໂດຍທີ່ເພິ່ນໄດ້ບອກອີກວ່າ ມຸມທີ່ເພິ່ນມັກທີ່ສຸດແມ່ນຫ້ອງຮັບແຂກທີ່ສາມາດເຫັນຕົ້ນໄມ້ແລະສວນທາງດ້ານນອກໄດ້ຫລາຍທີ່ສຸດ. ສິ່ງທີ່ໜ້າສົນໃຈໄປກວ່ານັ້ນກໍ່ຄື ຂອງສະສົມ ຫລືອາດຈະເອີ້ນວ່າເປັນຂອງຕົກແຕ່ງເຮືອນທີ່ເລົ່າເລື່ອງລາວການເດີນທາງທີ່ຍາວນານຂອງຊີວີດເພິ່ນ. ຂອງຕົກແຕ່ງທີ່ວ່ານີ້ ແມ່ນຂອງເກົ່າ ທີ່ມີອາຍຸຫລາຍສີບປີ ຫລືຫລາຍຮ້ອຍປີ, ຂອງສະສົມທີ່ມີເລື່ອງເລົ່າ ແລະປະຫວັດທີ່ມາຈາກຫລາຍໆປະເທດ ທີ່ເພີ່ນໄດ້ເດີນທາງໄປ. ດ້ວຍຄວາມທີ່ຂອງຕົກແຕ່ງຕ່າງໆທີ່ເປັນຂອງເກົ່າ ເຮັດໃຫ້ໂທນສີຂອງເຮືອນມີຄວາມເປັນສາກໃນອະດີດ ທີ່ມີຄວາມຮ່ວມສະໄໝ ແຖມຍັງມີຄວາມອົບອຸ່ນແລະມີມົນຂັງອີກດ້ວຍ.

ເລາະເຮືອນ

ທ່ານ ສົມສະໜຸກ ພາທີມລາຍນ໌ເຮົາຍ່າງຊົມຕາມແຕ່ລະມຸມຂອງເຮືອນ ພ້ອມກັບເລົ່າເລື່ອງລາວເບື້ອງຫລັງຂອງຕົກແຕ່ງເຫຼົ່ານັ້ນຢ່າງອອກລົດຊາດ. ຕູ້ປື້ມທີ່ຮວບຮວມເອົາໜັງສືທັງພາຍໃນ ແລະຕ່າງປະເທດໄວ້ເປັນອີກມຸມໜຶ່ງທີ່ບົ່ງບອກວ່າ ເພິ່ນເປັນ ນັກຂ່າວທີ່ຫລົງໄຫລໃນການອ່ານ ແລະສື່ທີ່ເປັນສິ່ງພິມ. ຫ້ອງເກັບຜົນງານສິລະປະ ທີ່ເປັນຮູບແຕ້ມ ທີ່ເພິ່ນໄດ້ບອກວ່າເຖິງເພິ່ນຈະບໍ່ມີເນື້ອທີ່ຂອງຝາໃຫ້ຫ້ອຍຮູບຕ່າງໆເຫລົ່ານີ້ ແຕ່ເພິ່ນກໍ່ຍັງເລືອກທີ່ຈະຊື້ມາເກັບໄວ້ເປັນຂອງສະສົມ ດົນໆເທື່ອກໍ່ເອົາອອກມາເບີ່ງຕາມແຕ່ລະໂອກາດ. ຖືວ່າເປັນຄວາມໂຊກດີຂອງເຮົາທີ່ໄດ້ມີໂອກາດໄດ້ເຫັນຜົນງານສິລະປະທີ່ຫາເບິ່ງຢູ່ທົ່ວໄປບໍ່ໄດ້.

ອີກໜຶ່ງມຸມທີ່ ເປັນມຸມພັກຜ່ອນແລະອ່ານໜັງສືຂອງເພິ່ນໃນມື່ທີ່ອາກາດດີໆ ນັ້ນກໍ່ຄື ຊານດ້ານຫລັງຂອງເຮືອນ ທີ່ຕໍ່ອອກໄປຕິດກັບສວນຫລັງບ້ານ ປະຕູແກ້ວບານເລື່ອນໃຫຍ່ທີ່ພ້ອມເປີດຮັບເອົາລົມແລະບັນຍາກາດທາງນອກເຂົ້າມາ, ໂທນສີຂອງເຟີນີເຈີ້ ທີ່ເປັນໂທນສີເຢັນ ເຮັດໃຫ້ໄດ້ອີກຄວາມຮູ້ສືກທີ່ແຕກຕ່າງຈາກທາງໃນເຮືອນຢ່າງສີ້ນເຊີງ.

ຮູບແບບການດຳລົງຊີວິດທີ່ລຽບງ່າຍ ແຕ່ເຕັມໄປດ້ວຍເລື່ອງລາວ ເຮັດໃຫ້ເຮົາບໍ່ແປກໃຈເລີຍວ່າ ເປັນຫຍັງ ທ່ານ ສົມສະໜຸກ ຈື່ງມີຂອງສະສົມທີ່ສຳຄັນອີກອັນໜຶ່ງ ທີ່ເປັນ ໂຕມ້າ, ທີ່ມີໃນເຮືອນຂອງເພີ່ນເປັນຮ້ອຍໆໂຕ. ສີ່ງນີ້ອາດຈະບົ່ງບອກວ່າ ມ້າ ສັດທີ່ເປັນໂຕແທນຂອງການເດິນທາງ ທີ່ບໍ່ເຄີຍອິດເມື່ອຍ, ມີຄວາມສະຫງ່າ ແລະເຂັ່ງຂືມ ຄືກັບເຈົ້າຂອງເຮືອນ ທ່ານນີ້ ທ່ານ ມີແຊນ ສົມສະໜຸກ ມີໄຊ ທີ່ມີຄວາມສຸຂຸມ ສະຫງ່າ ແລະຍັງຄົງສືບຕໍ່ເຮັດວຽກແລະກິດຈະກຳດ້ານຂ່າວແລະວັດທະນະທຳເຮົາແບບບໍ່ເຄີຍອິດເມື່ອຍ.

ທ່ານສົມສະໜຸກ ກັບມຸມພັກຜ່ອນທີ່ມັກ

ທ່ານສົມສະໜຸກ ກັບມຸມພັກຜ່ອນທີ່ມັກ

7

5

4

ມ້າ, ຂອງສະສົມແລະສັດທີ່ທ່ານສົມສະໜຸກຫລົງໄຫລ

ມ້າ, ຂອງສະສົມແລະສັດທີ່ທ່ານສົມສະໜຸກຫລົງໄຫລ

1

ທ່ານສົມສະໜຸກແກະກອ່ງຂອງສະສົມ

ທ່ານສົມສະໜຸກແກະກອ່ງຂອງສະສົມ

9

11

13

15

19

14