17435901_1721050134612901_6506163195654305379_o

7 ພັນໄມ້ປະດັບເສີມສິຣິມຸງຄຸນ ທີ່ຄວນມີໄວ້ປະດັບບ້ານ

17435901_1721050134612901_6506163195654305379_o

 

ການປູກໄມ້ປະດັບໃນເຮືອນເພື່ອເສີມສິຣິມຸງຄຸນ ກໍ່ເປັນອີກຄວາມເຊື່ອໜຶ່ງທີ່ຖືວ່າເປັນເລື່ອງດີ. ສຳລັບຄົນທີ່ຮັກ ແລະມັກໃນການປູກຕົ້ນໄມ້ແລ້ວ ການທີ່ໄດ້ປູກຕົ້ນໄມ້ທີ່ມີຮູບຊົງງາມໆ ອອກດອກ ໃຫ້ໃບທີ່ສວຍງາມເພີ່ມຄວາມສົດຊື່ນມີຊີວິດຊີວາ ກໍ່ຄົງຈະຮູ້ສຶກພໍໃຈແລ້ວ ຍິ່ງຖ້າຕົ້ນໄມ້ດັ່ງກ່າວມີຊື່ທີ່ເປັນສິລິມຸງຄຸນ ກໍ່ເຊື່ອແນ່ວ່ານັກປູກຕົ້ນໄມ້ທັງຫລາຍຍິ່ງຕ້ອງຊອກຫາ ແລະນຳມາປູກເພື່ອປະດັບສວນ ປະດັບເຮືອນ ແລະເສີມບາລະມີຢ່າງແນ່ນອນ.

ມາເລີ່ມກັນທີ່ ຕົ້ນກວັກມໍລະກົດ

ລັກສະນະທົ່ວໄປ ມີກ້ານໃບອວບນ້ຳ ໃບແຍກດ່ຽວມັນວາວເງົາງາມ ແລະມີສີຂຽວຄ້າຍຄືມໍລະກົດໃຫ້ຄວາມຮູ້ສຶກສົດຊື່ນ ມີຫົວຢູ່ໃຕ້ດິນ ແທງຍອດໃບເໜືອໜ້າດິນ ອອກດອກປັນແທ່ງ ຊໍ່ດອກຄ້າຍກັບດອກເດຫລີ ລຳຕົ້ນແຕກກໍງ່າຍ ແລະມີຂະໜາດໃຫຍ່ຂຶ້ນເລື່ອຍໆ. ກວັກມໍລະກົດປູກງ່າຍ ບໍ່ຄ່ອຍພົບບັນຫາເລື່ອງສັດຕູພືດລົບກວນ ແຕ່ຈະມີບັນຫາຫົວ ແລະຮາກເນົ່າ ຖ້າຫົດນ້ຳຫລາຍຈົນເກີນໄປ ຄວນປູກໃນດິນທີ່ລະບາຍນ້ຳໄດ້ດີ ຢູ່ໄດ້ໃນບ່ອນທີ່ມີແສງໜ້ອຍ ຍາມທີ່ແຕກໜໍ່ອອກມາກໍ່ຍິ່ງເພີ່ມຄວາມງາມຂຶ້ນ ແລະ ໃຫ້ປຸ໋ຍນ້ຳຫົດເດືອນລະຄັ້ງ

ຄວາມເປັນມຸງຄຸນ

ຕົ້ນກວັກມໍລະກົດ ເປັນຕົ້ນໄມ້ທີ່ມີຊື່ມຸງຄຸນ ເໝາະສຳລັບການນຳມາປູກປະດັບໃນເຮືອນ ແລະສຳນັກງານຫ້ອງການ ເຊື່ອກັນວ່າເມື່ອປູກແລ້ວຈະໄດ້ຮັບໂຊກລາບ

17492883_1721050077946240_3032122995971357467_o

ອັນທີ 2 ແມ່ນ ຫວ້ານນາງຄຸ້ມ ຫລື ຫວ້ານຜູ້ເຖົ້າເຝົ້າເຮືອນ

ລັກສະນະທົ່ວໄປ ເປັນຫວ້ານທີ່ມີຫົວຢູ່ໃຕ້ດິນ ລັກສະນະຄ້າຍຜັກບົ່ວຫົວໃຫຍ່ ຊຶ່ງປະກອບໄປດ້ວຍກີບຂອງຫົວທີ່ລຽງຊ້ອນກັນຢູ່ຈົນເປັນຫົວກົມ ໃບກົມສີຂຽວໃຫຍ່ໜາ ກ້ານໃບຍາວສີຂຽວແກ່ ຈະອອກດອກເປັນຊໍ່ຈາກກາງກໍ ກ້ານດອກເປັນແທ່ງສູງສື່ ຈະມີດອກຕູມກ່ອນແລ້ວບານເປັນສີຂາວ ມີເກສອນສີເຫລືອງ ກິ່ນຫອມ. ມັກດິນລະບາຍນ້ຳດີ ຫົດນ້ຳພໍປຽກ ເພື່ອບໍ່ໃຫ້ຮາກເນົ່າ.

ຄວາມເປັນມຸງຄຸນ

ເຊື່ອກັນວ່າ ຫວ້ານນາງຄຸ້ມເປັນຫວ້ານທີ່ມີຄວາມມຸງຄຸນປ້ອງກັນອັນຕະລາຍຕ່າງໆ ຖ້າປູກໄວ້ໃນເຮືອນຈະມີຄຸນທາງປ້ອງກັນອັກຄີໄພ.

17436032_1721050147946233_4519556831855375826_o

ຕາມມາດ້ວຍ ຫວ້ານນົກຄຸ້ມ

ລັກສະນະທົ່ວໄປ ຫວ້ານນົກຄຸ້ມເປັນຫວ້ານທີ່ມີຫົວຢູ່ໃຕ້ດິນ ຫົວເປັນແງ່ງກົມໆຕິດກັນ ເປັນພືດທີ່ໃບແທງຂຶ້ນຈາກຫົວໃຕ້ດິນ ໜ້າໃບມີລາຍຄ້າຍຄືກັບປີກນົກ ກ້ານໃບແຂງ ຊຶ່ງຫວ້ານນີ້ຈະມີຄວາມສວຍງາມຢູ່ທີ່ໃບ ມີດອກສີຂາວອົມມ່ວງເລັກນ້ອຍ ລັກສະນະດອກເປັນຮູບສາມຫລ່ຽມ. ຄວນປູກໃສ່ໂຖທີ່ມີປາກກວ້າງເພື່ອການແຕກໜໍ່ໃໝ່ໄດ້ໄວ ດິນຄວນລະບາຍນ້ຳໄດ້ດີເພື່ອປ້ອງກັນຫົວເນົ່າ ວາງໄວ້ບ່ອນທີ່ມີແດດລຳໄລ ຫົດນ້ຳໃຫ້ຊຸ່ມມື້ລະເທື່ອ

ຄວາມເປັນມຸງຄຸນ

ເຊື່ອກັນວ່າຖ້າປູກຫວ້ານນົກຄຸ້ມໄວ້ໃນບໍລິເວນເຮືອນ ຈະໃຫ້ຄຸນດ້ານການປ້ອງກັນອັນຕະລາຍຕ່າງໆ ໂດຍສະເພາະປ້ອງກັນອັກຄີໄພ.

 17436242_1721050414612873_1852725572969082243_o

ແລະພິເສດສຸດ ຫວ້ານເສດຖີເຮືອນນອກ

ລັກສະນະທົ່ວໄປ ເປັນໄມ້ປະດັບຂະໜາດນ້ອຍ ມີຫົວຢູ່ໃຕ້ດິນ ບໍ່ມີລຳຕົ້ນ ໃບແຕກກະຈາຍອອກເປັນພຸ່ມເໜືອດິນ ໃບຮຽວຍາວຄ້າຍໃບຫົວສີໄຄ ແຕ່ສັ້ນກວ່າຫລາຍ ມີໃບທີ່ດ່າງຂາວ ຫລືຂາວນວນທີ່ຮີມໃບ ເມື່ອໃບຍາວເຕັມທີ່ຈະໂຄ້ງງໍລົງດິນ ແລະເມື່ອຈະເລີນເຕີບໂຕເຕັມທີ່ຈະເລືອໄປຕາມໜ້າດິນແຕກເປັນຕົ້ນໃໝ່ ສາມາດຕັດແຍກໄປປູກໄດ້ອີກ. ຫວ້ານເສດຖີເຮືອນນອກມັກດິນປົນຊາຍ ລະບາຍນ້ຳໄດ້ດີ ມັກແດດລຳໄລ ຫລືປູກໃນຮົ່ມໃຫ້ຖືກແສງແດດບາງເວລາ ຫົດນ້ຳປານກາງ.

ຄວາມເປັນມຸງຄຸນ

ເຊື່ອກັນວ່າເສດຖີເຮືອນນອກ ນອກຈາກຈະມີຄຸນໃນທາງຄຸ້ມຄອງປ້ອງກັນໄພແລ້ວ ຍັງຖືເປັນຫວ້ານສ່ຽງໂຊກ ຫາກຫວ້ານຈະເລີນງອກງາມດີ ອອກດອກຫລາຍ ຜູ້ປູກຈະມີຖານະຈະເລີນຮຸ່ງເຮືອງດ້ວຍ.

17436122_1721050871279494_5807962240558878522_o

ຂາດບໍ່ໄດ້ ຫວ້ານເສດຖີກອບຊັບ

ລັກສະນະທົ່ວໄປ ເປັນພືດມີຫົວຢູ່ໃຕ້ດິນ ລັກສະນະເປັນກໍ ຍອດໃບແທງຂຶ້ນມາຈາກຫົວ ແລະເມື່ອໃບໃຫຍ່ເຕັມທີ່ຈະຄ່ອຍໆໂຄ້ງລົງຫາໂຄນຕົ້ນ ບາງຕົ້ນອາດຂົດມ້ວນເປັນວົງ ແຕ່ບາງຕົ້ນກໍ່ໃບຊື່ ໃບຮຽວນ້ອຍສີຂຽວເປັນມັນ ນິຍົມປູກໃສ່ກະຖາງຕັ້ງໄວ້ໃນທີ່ຮົ່ມຫລືແດດລຳໄລ

ຄວາມເປັນມຸງຄຸນ

ຖືກັນວ່າເປັນຫວ້ານເມດຕາມະຫານິຍົມ ຫາກນຳມາໄວ້ໃນຮ້ານຄ້າກໍ່ຈະຊື້ງ່າຍຂາຍຄ່ອງ ແລະຍັງເປັນຫວ້ານສ່ຽງທາຍຄື ຫາກປາຍໃບມ້ວນເປັນວົງໝົດທຸກໃບ ທຸລະກິດການງານຈະປະສົບຜົນສຳເລັດດີ ຍິ່ງຖ້າຕົ້ນໃດອອກດອກຈະຍິ່ງມີໂຊກລາບຍິ່ງຂຶ້ນ ຖ້າໃບສື່ບໍ່ມ້ວນງໍ ກໍ່ຈະບໍ່ມີໂຊກ ການງານບໍ່ປະສົບຜົນສຳເລັດເທົ່າທີ່ຄວນ.

17493177_1721050311279550_954427204913665974_o

ຫວ້ານສະເໜ່ຈັນແດງ

ລັກສະນະທົ່ວໄປ ສະເໜ່ຈັນເປັນໄມ້ຟຸ່ມເຕ້ຍ ແຕກກໍສູງປະມານ 45-60 ເຊັນ ມີຫົວຢູ່ໃຕ້ດິນລຳຕົ້ນຢູ່ເໜືອດິນ ກ້ານໃບກົມສີຂຽວຫລືຂຽວອົມແດງ ຫລືແດງເລືອດໝູ ລັກສະນະໃບເປັນຮູບຫົວໃຈ ໂຄນໃບກົມເວີ້ມເຂົ້າຫາກ້ານໃບ ໃບສີຂຽວເຂັ້ມເປັນມັນ ຫລັງໃບອາດມີສີແດງເລືອດໝູ ອອກດອກເປັນຊໍ່ແທງອອກມາຈາກກາງຕົ້ນ ເປັນໄມ້ປະດັບທີ່ມີຄວາມສວຍງາມ ດ້ວຍຄວາມໂດດເດັ່ນຂອງໃບທີ່ເປັນຮູບຫົວໃຈທີ່ມີສີຂຽວເຂັ້ມຕັດກັບສີແດງເຂັ້ມຂອງກ້ານໃບ. ປູກໃນດິນລະບາຍນ້ຳດີ ວາງໄວ້ບ່ອນແດດລຳໄລ ເປັນພັນໄມ້ທີ່ຂະຫຍາຍພັນໄດ້ໄວ. ນອກນີ້ລັກສະນະທີ່ໂດດເດັ່ນອີກຢ່າງຂອງຫວ້ານສະເໜ່ຈັນແດງກໍ່ຄື ເປັນໄມ້ປະດັບທີ່ມີຄວາມສາມາດສູງໃນການດູດຊັບສານພິດໃນອາກາດອີກດ້ວຍ.

ຄວາມເປັນມຸງຄຸນ

ເຊື່ອກັນວ່າຫາກໃຜປູກໄວ້ແລ້ວຈະຊ່ວຍເພີ່ມສະເໜ່ເມດຕາມະຫານິຍົມ ແລະເພີ່ມຄວາມໂຊກດີ ຫາກນຳໂຖຕົ້ນສະເໜ່ຈັນແດງມາຕັ້ງໄວ້ໃນຮ້ານຄ້າ ຈະເຮັດໃຫ້ການຄ້າດີມີກຳໄລ.

17492318_1721050544612860_7354269637854328301_o

ແລະ ທ້າຍສຸດ ຫວ້ານລວຍບໍ່ເລີກ

ເປັນໄມ້ອວບນ້ຳປະເພດດຽວກັບຕົ້ນຕະບອງເພັດ ໃບອ່ອນນຸ້ມຄືຍາງ ໜ້າໃບຈະມີຈຸດສີຂຽວເຂັ້ມພື້ນໃບສີຂຽວອ່ອນ ດອກສີຂາວເປັນກ້ານຍາວ ຊູຊໍ່ຂຶ້ນເໝືຶອຕົ້ນ ປະມານ 1 ຄືບ ບາງຄັ້ງດອກຈະເອ່ນຕາມນ້ຳໜັກຂອງຊໍ່ດອກ ມີດອກຍ່ອຍຂະໜາດນ້ອຍໆເປັນຕຸ່ມໆຕິດທີ່ກ້ານດອກໄລ່ໄປຮອດຍອດ. ມັກດິນທີ່ລະບາຍນ້ຳດີ ມັກແດດທີບໍ່ແຮງ ສາມາດປູກເປັນໄມ້ປະດັບໃນຮົ່ມ ຕົກແຕ່ງຫ້ອງການ ແລະບໍລິເວນເຮືອນໄດ້.

ຄວາມເປັນມຸງຄຸນ

ຫວ້ານລວຍບໍ່ເລີກມີຄວາມມຸງຄຸນຕາມຊື່ ຄືເມື່ອປູກແລ້ວຈະລ້ຳລວຍຕະຫລອດໄປ

 17434497_1721050667946181_6575406198814330826_o
ທ່ານໃດທີ່ຮັກເຮືອນ ແລະຕ້ອງການເສີມສິຣີມຸງຄຸນໃຫ້ເຮືອນທ່ານ ກໍ່ສາມາດຊອກເບິ່ງພັນໄມ້ເຫລົ່ານີ້ໄດ້ ມາປູກໃນວັນທີ 1 ເດືອນ 6 ນີ້ ກັບຄອບຄົວຂອງທ່ານ