Chic Lines 7

Seek-Nature at Paksong Bolaven ປາກຊ່ອງດິນແດນແຫ່ງຄວາມອຸດົມສົມບູນຂອງພືດພັນ

Chic Lines 7 Chic Lines 6Chic Lines 9

ໃນຂະນະທີ່ອຸນຫະພູມຂອງປະເທດເຮົາສູງຂຶ້ນທຸກໆມື້, ຈົ່ງເລືອກວັນພັກຜ່ອນທ້າຍອາທິດ, ປົງຈອກກາເຟໃນມືລົງ ແລ້ວພາຍກະເປົ໋າລ່ອງໃຕ້ສູ່ຕົ້ນກຳເນີດກາເຟທີ່ດີທີ່ສຸດຂອງລາວ. ເມືອງປາກຊ່ອງ ແຂວງຈຳປາສັກດິນແດນ ພູພຽງບໍລະເວນແຫລ່ງປູກກາເຟຊັ້ນຍອດ ດ້ວຍດິນພູເຂົາໄຟເກົ່າແລະຢູ່ສູງຈາກໜ້ານຳ້ທະເລກວ່າ 1000ແມັດ. ຈາກຕົວເມືອງປາກເຊ ໄປອີກ40 ກິໂລແມັດ, 2ຂ້າງທາງຫລວງຂອງເມືອງປາກຊ່ອງຖືກປົກຄຸມໄປດ້ວຍສີຂຽວຂອງຕົ້ນກາເຟ ຍາວຈົນສຸດສາຍຕາ.
ທາງດິນແດງນ້ອຍໆ ເປັນປະຕູທາງເຂົ້າໄປສູ່ການຄົ້ນຫາສິ່ງພິເສດທີ່ເຊື່ອງຊ້ອນທ່າມກາງທຳມະຊາດ.Chic Lines 5

Chic lines ຈະພາທ່ານໄປຄົ້ນຫານິຍາມຂອງການທ່ອງທ່ຽວທຳມະຊາດ, ສຳຜັດຫົວໃຈຂອງສວນກາເຟທີ່ກວ້າງໃຫຍ່.ໜານຂອງຕົ້ນກາເຟທີ່ຢືນຕົ້ນສູງ2ແມັດ                                                                                    ປູກເດຍລະດາດໄປທົ່ວອານາເຂດ ມີຕົ້ນໄມ້ໃຫຍ່ເປັນຮົ່ມເພື່ອເປັນໂຕກັ່ນຕອງແສງຈາກທຳມະຊາດ ລົງສູ່ເບ້ຍກາເຟ ເພື່ອການເຕີບໃຫຍ່ຢ່າງມີຄຸນນະພາບ.

ສຳຜັດວິຖີຊີວິດ ຜ່ນກິ່ນຫອມຂອງກາເຟ

ສຳຜັດວິຖີຊີວິດ ຜ່ນກິ່ນຫອມຂອງກາເຟ

 

 

ທ່າມກາງສວນຂະໜາດກວ້າງໃຫຍ່ໄພສານແຫ່ງນີ້ ສິ່ງພີເສດໄດ້ຄ່ອຍໆປະກົດອອກມາໃຫ້ເຫັນເທື່ອລະນ້ອຍ. ເລິ່ມຈາກພາບຂອງການເກັບກາເຟຂອງຊາວສວນກາເຟໃນທ້ອງຖິ່ນ,ມີທັງຜູ່ໃຫຍ່ແລະເດັກນ້ອຍທີ່ຕັ້ງໃຈເກັບກ່ຽວຜົນລະປູກທີ່ດີທີ່ສຸດ. ສຽງທັກທາຍແລະຮອຍຍີ້ມທີ່ຈິງໃຈຈາກກຸ່ມຄົນເຫລົ່ານັ້ນເປັນອີກໜຶ່ງມົນສະເໜ່ ແລະສະແດງໃຫ້ເຫັນວິຖີຊີວີດອີກມຸມໜຶ່ງທີ່ບໍ່ຄ່ອຍໄດ້ພົບເຫັນ.

 

ເມັດກາເຟສົດສີແດງ ຈະຖືກຄັດເລືອກໃຫ້ໄດ້ເມັດທີ່ດີສຸດ ເພື່ອນຳໄປສູ່ຂະບວນການຂົ້ວແລະນຳອອກສູ່ທ້ອງຕະຫຼາດ,ມີກາເຟທີ່ດີໃຫ້ເຮົາໄດ້ເລືອກສັນ. ການເຫັນຂະບວນການຂົ້ວກາເຟເປັນຄັ້ງທຳອິດ ເຮັດໃຫ້ຮູ້ເລື່ອງລາວແລະກຳມະວີທີໃນການຜະລິດ.ສຽງຈາກການຄົນເມັດກາເຟ ສົ່ງກິ່ນຫອມອອກມາເຕະດັງ. ເມື່ອເມັດກາເຟ ກາຍເປັນສີດຳພ້ອມກັບສົ່ງກິ່ນຫອມ ເຮັດໃຫ້ຄິດຂຶ້ນໄດ້ວ່າ ຂະໜາດຄວາມຫອມຂອງເມັດກາເຟຍັງຖືກເຊື່ອງໄວ້ໃນເປຶອກແດງໆ ກວ່າຈະຍອມເຜີຍກິ່ນຫອມໆອອກມາໃຫ້ສູດດົມໄດ້ຍັງຕ້ອງໄດ້ຜ່ານການຂົ້ວທີ່ຍາວນານ. ຖ້າເຮົາບໍ່ລອງອອກມາຄົ້ນຫາເຮົາກໍ່ຄົງຈະບໍ່ພົບສິ່ງທີ່ເບິ່ງຄືທຳມະດາແຕ່ພີເສດນີ້ໄດ້.

 

ນອກຈາກກິດຈະກຳການເກັບເມັດກາເຟຂອງຊາວສວນແລ້ວ, ເຮົາຍັງເຫັນວິຖີຂອງການດຳລົງຊີວິດທ່າມກາງທຳມະຊາດທີ່ແສນຈະລຽບງ່າຍ.ທຸກກ້າວຍ່າງມັກຈະມີເລື່ອງລາວເກີດຂຶ້ນໃຫ້ໄດ້ບັນທຶກເປັນຄວາມຊົງຈຳ.

ສວນກາເຟຂອງເມືອງປາກຊ່ອງ ໃນຄວາມຄິດຂອງຄົນທົ່ວໄປອາດຈະບໍ່ໄດ້ເປັນແຫລ່ງທ່ອງທ່ຽວທີ່ສາມາດໃຫ້ຄວາມເພີດເພີນໃຈ; ການເຂົ້າໄປທ່ຽວສວນກາເຟ ກໍ່ຄົງຈະບໍ່ມີຫຍັງຫຼາຍໄປກວ່າການເຫັນເມັດກາເຟ ແຕ່ທ່ານເຊື່ອບໍວ່າ ພຽງແຕ່ທ່ານເປີດໃຈ ຄົ້ນຫາຄວາມອຸດົມສົມບູນຂອງທຳມະຊາດ ທ່ານອາດຈະບໍ່ໄດ້ຫົວແບບດັງໆ,ບໍ່ໄດ້ຟັງເພງເຕັ້ນທີ່ທ່ານມັກ, ແຕ່ທ່ານຈະໄດ້ຍິນສຽງລົມເບົາໆ ທີ່ຄ້າຍກັບສຽງດົນຕີຂັບກ່ອມ,ໄດ້ຍີ້ມນ້ອຍໆໃຫ້ກັບເຫດການທີ່ທ່ານບໍ່ເຄິຍເຫັນ,ໄດ້ສຳຜັດຊີວິດອີກມຸມມອງໜຶ່ງຂອງຄົນທີ່ທ່ານບໍ່ເຄີຍຮູ້ຈັກ, ໄດ້ວາງເລື່ອງລາວໜັກໆໃນໂລກຂອງຄວາມຈິງໄວ້ຊົ່ວຄາວທີ່ສວນກາເຟ, ແລ້ວການດື່ມກາເຟຄັ້ງຕໍ່ໄປຂອງທ່ານຈະໃຫ້ລົດຊາດແລະກິ່ນທີ່ຫອມຫວນຍິ່ງຂິ້ນ.

Chic Lines 8Chic Lines 2Chic Lines 3

ເຊື່ອໂລດວ່າ ສວນກາເຟຂອງ ດິນແດນພູເທວະດາ1 ແຫ່ງນີ້ສາມາດເປັນການທ່ອງທ່ຽວແບບ Chic chic ໄດ້ໂດຍທີ່ບໍ່ໄດ້ເສຍຄ່າ ແຖມຍັງຫອບຄວາມຮູ້ສຶກແປກໃໝ່ທີ່ໄດ້ຈາກການຄົ້ນຫາທຳມະຊາດກັບບ້ານອີກດ້ວຍ.

 

1*  ຄົນໃນທ້ອງຖິ່ນຫຼືໃນໝູ່ນັກທ່ອງທ່ຽວຈະເອີ້ນ ປາກຊ່ອງ(ພູພຽງບໍລະເວນ) ນີ້ວ່າ ພູເທວະດາ.