ກະຊວງວິທະຍາສາດ ແລະ ເຕັກໂນໂລຊີແຫ່ງ ສປປ.ລາວ ຈັບມືກັບກະຊວງວິທະຍາສາດ ແລະ ເຕັກໂນໂລຊີແຫ່ງ ສສ ຫວຽດນາມ ຈັດກອງປະຊຸມສຳມະນາສົ່ງເສີມການຖ່າຍທອດ ເຕັກໂນໂລຊີທີ່ນະຄອນຫລວງວຽງຈັນ ເພື່ອເປີດສັກກະລາດໃຫມ່ແຫ່ງການຮ່ວມມືຂອງ 2ປະເທດລາວ-ຫວຽດນາມ

ລະຫວ່າງວັນທີ 9-10 ສິງຫາ ປີ 2018 ທີ່ສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ ກະຊວງວິທະຍາສາດ ແລະ ເຕັກໂນໂລຊີ ປະເທດລາວ ໄດ້ມີການຈັດກອງປະຂຸມສຳມະນາສົ່ງເສີມການຖ່າຍທອດເຕັກໂນໂລຊີ ລາວ-ຫວຽດນາມ 2018. ໂດຍໃນວັນທີ 9 ແມ່ນພິທິເປີດກອງປະຊຸມຢ່າງເປັນທາງການ ໂດຍແມ່ນການເຂົ້າຮ່ວມ ຂອງທ່ານ ບັນດິດ ສຈ. ບໍ່ວຽງຄຳ ວົງດາລາ ລັດຖະມົນຕິກະຊວງ ວິທະຍາສາດ ແລະ ເຕັກໂນໂລຊີ ແຫ່ງ ສປປ.ລາວ ແລະ ທ່ານຮອງລັດຖະມົນຕີ ເຈີນວັນຕຸງ ຈາກ ສສ.ຫວຽດນາມ ໃນການກ່າວເປີດພິທິຢ່າງເປັນທາງການ.  ນອກຈາກນັ້ນ ທ່ານ ຟາມວັນກ້ຽມ ຮອງປະທານສະພາບັນດິດວິທະຍາສາດ ສສ.ຫວຽດນາມ ໄດ້ຂຶ້ນສະເຫນີການຮ່ວມມື, ການຖ່າຍທອດເຕັກໂນໂລຊີຂອງສະພາບັນດິດວິທະຍາສາດຫວຽດນາມກັບຄູ່ຮ່ວມມືຝ່າຍລາວ. ທີ່ເປັນ Hightlight ຂອງການຮ່ວມມືໃນຄັ້ງນີ້ຍັງແມ່ນພິທີເຊັນສັນຍາຮ່ວມມື MOU ການຖ່າຍທອດເຕັກໂນໂລຊີລະຫວ່າງບັນດາສະຖາບັນການຄົ້ນຄ້ວາມະຫາວິທະຍາໄລທຸລະກິດຫວຽດນາມກັບບັນດາຄູ່ຮ່ວມມືຂອງລາວ. ເຊິ່ງການເຊັນສັນຍາດັ່ງກ່າວແມ່ນສັນຍານອັນດີໃນການເຄື່ອນໄຫວ ແລະ ພັດທະນາເຕັກໂນໂລຊີ ແລະ ວິທະຍາສາດຂອງ 2 ປະເທດໃຫ້ນັບມື້ນັບຂະຫຍາຍອອກໃນວົງກວ້າງ.

ພາຍໃນງານທັງ 2 ວັນ ຜູ້ເຂົ້າຮ່ວມຈະໄດ້ຊົມການວາງສະແດງ ແລະ ການແນະນຳເຕັກໂນໂລຊີຂອງ 2 ປະເທດ ລາວ-ຫວຽດນາມ ທີ່ມາວາງສະແດງຜ່ານການຄົ້ນຄວ້າໃນໄລຍະທີ່ຜ່ານມາເຊັ່ນ: ​ເຕັກໂນໂລຊີໃນການເກັບຮັກສາຜະລິດຕະພັນອຸດສະຫະກຳ-ກະສິກຳ, ເຕັກໂນໂລຊີການລ້ຽງປາກະຊັງໃນການນຳໃຊ້ປລາສຕິກ HDPE ຕົ້ນທຶນຕໍ່າ, ເຕັກໂນໂລຊີເພື່ອການກະສິກຳສະອາດ, ການໃຊ້ລະບົບນໍ້າຫມູນວຽນເພື່ອການປູກຜັກສະອາດ ແລະ ອີກຫລາກຫລາຍ.

ນອກເຫນືອຈາກການຊົມການວາງສະແດງນະວັດຕະກຳຕ່າງໆ ຍັງມີການຈັດສຳມະນາທີ່ມີວິທະຍາກອນທີ່ຊ່ຽວຊານໃນດ້ານຕ່າງໆຈາກ 2 ປະເທດມາຮ່ວມຖ່າຍທອດ ແລະ ໃຫ້ຄວາມຮູ້ກ່ຽວກັບຄວາມສຳຄັນຂອງວິທະຍາສາດ ແລະ ເຕັກໂນໂລຊີໃນຍຸກປັດຈຸບັນ.

ວັນທີ 10 ສິງຫາ ແມ່ນການຈັບມືຄູ່ຮ່ວມທຸລະກິດແລກປ່ຽນກັນລະຫວ່າງພາກລັດ ແລະ ພາກວິສະຫະກິດຂອງທັງ 2 ປະເທດ.

ການຮ່ວມມືໃນຄັ້ງນີ້ຈະເປັນບາດກ້າວອັນສຳຄັນຂອງການຮ່ວມມື ແລະ ພັດທະນາດ້ານວິທະຍາສາດ ແລະ ເຕັກໂນໂລຊີຂອງທັງ 2 ປະເທດລາວ-ຫວຽດນາມ ແລະ ກະຊັບຄວາມສຳພັນໃຫ້ແຫນ້ນແຟ້ນຂຶ້ນໄປຕື່ມລະຫວ່າງ 2 ຊາດອີກດ້ວຍ.