ວິຖີຊີວິດລຽບງ່າຍ ໃນອ້ອມກອດຂອງສະຖາປັດຕະຍະກຳລາວ ແລະກິ່ນອາຍອາຊີຜ່ານການຕົກແຕ່ງເຮືອນທີ່ທຸກຄົນຕ້ອງຫລົງສະເຫນ່.

ໃນກະແສຂອງຄວາມຮີບດ່ວນໃນນະຄອນຫລວງວຽງຈັນ, ດິນເປົ່າຫວ່າງໃຈກາງຕົວເມືອງຖືກຈັບຈອງດ້ວຍ ອາຄານ ບ້ານຊ່ອງ ແລະສະຖາປັດຕະຍະກຳຫລາກຫລາຍປະເພດ. ລັກສະນະຂອງອາຄານເຫລົ່ານັ້ນ ກໍ່ຈະສະແດງຄວາມເປັນໄປຂອງຍຸກສະໄຫມ. ແລະກໍ່ເປັນສິ່ງທີ່ເຮົາປະຕິເສດບໍ່ໄດ້ວ່າ ບັນດາວັດສະດຸປະເພດ ເຫລັກ ຄອນກຣີດ ໄດ້ຖືກນຳເຂົ້າມາໃຊ້ຢ່າງຫລວງຫລາຍ. ຈົນປັດຈຸບັນ ອາຄານໄມ້ ຫລື ເຮືອນໄມ້ ກາຍເປັນຂອງຫາຍາກໃນນະຄອນຫລວງວຽງຈັນໄປແລ້ວ.

 

ແຕ່ທີ່ບ້ານໜອງປິງ ຫ່າງຈາກໃຈກາງເມືອງ ປະມານ 6 ກິໂລແມັດ, ທີ່ພໍຈະຫລົບຈາກສະພາວະລົດແອອັດກາງທ້ອງຖະໜົນ, ຮົ້ວເຮືອນລາວຫລັງຫນຶ່ງເປີດຕ້ອນຮັບດ້ວຍທາງຍ່າງຫີນ ທີ່ທັງ2ຂ້າງເຕັມໄປດ້ວຍຕົ້ນໄມ້ ຂຽວອຸ່ມທຸ່ມນ້ອຍໃຫຍ່ ກ່ອນຈະນຳເຮົາໄປພົບກັບຕົວເຮືອນຂະຫນາດພໍດິ ແຕ່ເຕັມໄປດ້ວຍຄວາມປະທັບໃຈຕັ້ງແຕ່ຄັ້ງທຳອິດທີ່ເຫັນ.

ໂຖງຕ້ອນຮັບຂະຫນາດພໍດີຂອງເຮືອນ ມັງດາໄລ ຕ້ອນຮັບເຮົາດ້ວຍສຽງລົມທີ່ກະທົບໃສ່ກະລີ່ງ ດັງເປັນຈັງຫວະມ່ວນຫູ ເຮັດໃຫ້ຮູ້ສຶກວ່າ ເຮົາບໍ່ໄດ້ຢູ່ໃນນະຄອນຫລວງອີກຕໍ່ໄປ.  ດ້ວຍຄວາມທີ່ບ່ອນຕ້ອນຮັບຂອງເຮືອນເປີດໂລ່ງ ປາສະຈາກເຊິ່ງຝາຂັ້ນ ນັ້ນເຮັດໃຫ້ທຳມະຊາດ ແລະສວນຫນ້າບ້ານເຂົ້າມາເປັນສ່ວນຫນື່ງຂອງເຮືອນໄດ້ບໍ່ຍາກ ທັງດ້ານທັດສະນີຍະພາບ ແລະຄວາມຮູ້ສຶກ.

ຈາກສ່ວນໂຖງຕ້ອນຮັບ ມີທາງຍ່າງທີ່ເປັນດັ່ງຂົວຕໍ່ໄປຍັງເບື້ອງເຮືອນໃຫຍ່, ທາງຍ່າງນີ້ ເປີດໂລ່ງສູ່ທ້ອງຟ້າ ປາສະຈາຫລັງຄາບົດບັງ ເຮັດໃຫ້ແສງສະຫວ່າງຈາກທຳມະຊາດເຂົ້າສູ່ ລະບຽງອ້ອມຕົວເຮືອນໄດ້ຍ່າງດີ. ນອກຈາກນັ້ນ ທາງຍ່າງນີ້ຍັງມີ Patio ນ້ອຍ2 ຂ້າງທີ່ມີຕົ້ນໄມ້ຢືນຕົ້ນສູງເພື່ອເຮັດໃຫ້ພື້ນທີ່ສົດຊື່ນຂຶ້ນໄປຕື່ມ.

ພື້ນທີ່ສ່ວນກາງຂອງເຮືອນ ແນ່ນອນວ່າແມ່ນຫ້ອງຮັບແຂກ ທີ່ເຕັມໄປດ້ວຍ ຂອງຕົກແຕ່ງຈາກປະເທດຕ່າງໆໃນແຖບອາຊີ ເຮັດໃຫ້ກິ່ນອາຍດັ່ງກ່າວອົບອວນໄປທົ່ວຫ້ອງ. ນັ່ງລົງທີ່ໂຊຟາກາງຫ້ອງ ເພື່ອໂອ້ລົມກັບເຈົ້າຂອງເຮືອນ ແລະທຳຄວາມຮູ້ຈັກກັບທີ່ມາຂອງແນວຄວາມຄິດ ການສ້າງ ເຮືອນໄມ້ ຫລັງນີ້ໃຫ້ຫລາຍຂຶ້ນ.

ສີ່ງຫນື່ງທີ່ ເຮືອນມັງດາໄລ ສື່ອອກເຖິງຄວາມເປັນເຮືອນລາວ ນັ້ນຄື: ການທີ່ເຮືອນ ແລະທຳມະຊາດກອດກ້ຽວກັນເປັນຫນຶ່ງດຽວ ແລະສິ່ງທີ່ເຮັດໃຫ້ເປັນແບບນັ້ນ ກໍ່ຄືຄວາມເປັນວັດສະດຸໄມ້ນັ້ນເອງ.

ແລະນອກຈາກຄວາມເປັນລາວ ທີ່ສື່ຜ່ານຮູບແບບເຮືອນໄມ້ ຊູເສົາ, ຝາກະແຕະສານຈາກໄມ້ໄຜ່ ແລະ ຫລັງຄາ ແລ້ວນັ້ນ, ເຮືອນມັງດາໄລຍັງເຊື່ອງຊ້ອນ ຈຸດຂາຍເລັກໆນ້ອຍໆໄວ້ ເຊັ່ນ: ບານປະຕູ ແລະປ່ອງຢ້ຽມຂອງທຸກຫ້ອງທີ່ໄດ້ແຮງບັນດານໃຈມາຈາກບານປະຕູຂອງວັດຕ່າງໆໃນປະເທດລາວ. ແລ້ວເພິ່ນກໍ່ໄດ້ໃຫ້ຊ່າງລາວເຮັດຂຶ້ນໂດຍສະເພາະສຳລັບບ້ານຫລັງນີ້. ນອກຈາກນັ້ນຍັງມີລັກສະນະຂອງຮູບແບບສະຖາປັດຕະຍະກຳເຮືອນຢູ່ອາໄສຈາກຫລາກຫລາຍຂົງເຂດໃນອາຊີ ເຊັ່ນຊຸ້ມປະຕູ ແບບພະມ້າ,ໄທ, ບາຫລີ ແລະອື່ນໆ. ແລະເປັນການປະສົມປະສານກັນທີ່ລົງໂຕ ແລະອອກມາສວຍງາມຍິ່ງ.

ຕົວເຮືອນ ທີ່ອັດແຫນ້ນໄປດ້ວຍລາຍລະອຽດທີ່ຜ່ານການບັນຈົງຕື່ມຂອງຕົກແຕ່ງແຕ່ລະອັນຜ່ານການເວລາ, ເຟິນິເຈິ້ ທີ່ເຈົ້າຂອງເຮຶອນໄດ້ອອກແບບເອງ ແລະສັ່ງເຮັດເອງນັ້ນ ເຮັດໃຫ້ເຄື່ອງເຮືອນແຕ່ລະອັນ ເຕັມໄປດ້ວຍຄຸນຄ່າ ແລະເລື່ອງລາວ.

ໃນເຮືອນຫລັງນີ້ປະກອບດ້ວຍ 4 ຫ້ອງຫລັກ ນັ້ນຄື: ຫ້ອງຮັບແຂກ, ຫ້ອງນອນໃຫ່ຍ (Family wing) ທີ່ຢູ່ເບື້ອງຂວາມື, ຫ້ອງນອນສຳລັບແຂກ (guest wing) ທີ່ຈະປະກອບມີ 2 ຫ້ອງນອນ. ແລະຫ້ອງຄົວ ພ້ອມຫ້ອງກິນເຂົ້າ. ແຕ່ລະຫ້ອງນັ້ນ ມີລັກສະນະການຕົກແຕ່ງທີ່ຕ່າງກັນເລັກນ້ອຍ. ແຕ່ເຕັມໄປດ້ວຍເລື່ອງລາວສະເພາະໂຕ ຈາກຂອງຕົກແຕ່ງທີ່ຕ່າງທີ່ມາ ແລະເຄື່ອງເຟີນີເຈີ້ ທີ່ເຈົ້າຂອງອອກແບບເອງ ເຮັດໃຫ້ເຮົາສຳຫລວດແຕ່ລະຫ້ອງແບບຜ່ານໆບໍ່ໄດ້.

ເມື່ອສຳຜັດກັບ ອ້ອມກອດຂອງເຮືອນໄມ້ຫລັງນີ້ແບບທຸກຊອກທຸກມຸມແລ້ວ, ເຮົາກໍ່ບໍ່ລືມທີ່ຈະລົງມາສຳຫລວດສວນ ທີ່ເອີ້ນໄດ້ວ່າເປັນປ່າສ່ວນຕົວຂອງເຮືອນ.

ກ້ອງຕະລ່າງຂອງເຮືອນ ມີມຸມພັກຜ່ອນ ທີ່ເຢັນສະບາຍ, ອູ່ເຊືອກຜູ້ໃສ້ເສົາເຮືອນ ຊວນໃຫ້ຄິດຮອດບັນຍາກາດຕອນຍັງນ້ອຍທີ່ມັກນອນງາຍກ້ອງຕະລ່າງເຮືອນ. ວິວດ້ານຫນ້າເປັນສວນ ແລະທາງຍ່າງໄປຫາສະລອຍນຳ້ເບື້ອງຫລັງຂອງເຮືອນ ພ້ອມກັບສາລາໄມ້ສຳລັບພັກຜ່ອນໃນທ້າຍອາທິດ.

ຖ້າທ່ານຈະມີເຮືອນຫນື່ງຫລັງ ທ່ານປາຖະຫນາຈະມີເຮືອນໃນຝັນແບບໃດ, ຫລາຍຄົນກໍ່ຕ່າງຄວາມຄິດ ຫລາກຫລາຍຄວາມມັກທີ່ແຕກຕ່າງກັນໄປ ແຕ່ຈະມີຈັກຮູບແບບເຮືອນທີ່ຈະສະທ້ອນໃຫ້ເຫັນໂຕຕົນທີ່ເປັນເອກະລັກຂອງຊາດເຂົ້າໄປໄດ້ພ້ອມ,ບໍ່ໄດ້ຫມາຍຄວາມວ່າທຸກຄົນຕ້ອງມີແນວຄິດແບບດຽວກັນ ແຕ່ເຮົາຢາກບອກວ່າ ເຮືອນມັງດາໄລ ເປັນອີກຫນຶ່ງຮູບແບບເຮືອນຢູ່ອາໄສ ທີ່ເຕັມປ່ຽມໄປດ້ວຍ ຄວາມມັກ ຄວາມຫລົງໄຫລ ຂອງເຈົ້າຂອງເຮືອນ ແລະເລື່ອງລາວທີ່ພ້ອມຈະເລົ່າຜ່ານສະຖາປັດຕະຍະກຳໄມ້ນີ້ໄດ້ຢ່າງສົມບູນ ຍິ່ງເມືອເວລາຜ່ານໄປດົນສຳ່ໃດ ກໍ່ຈະຍັງຄົງເຫລືອເປັນອີກຫນຶ່ງຮ່ອງຮອຍຂອງຮູບແບບເຮືອນລາວໄວ້ໄດ້ໃຫ້ບອກຕໍ່. ດັ່ງນັ້ນເຮົາຈຶ່ງເວົ້າໄດ້ວ່າ ເຮືອນຫລັງນີ້ ບໍ່ແມ່ນພຽງແຕ່ເປັນຜົນງານທາງສະຖາປັດຕະຍະກຳ ທີ່ສອດແຊກສິລະປະເອົາໄວ້ເທົ່ານັ້ນ ແຕ່ມັນຄືສານຫນຶ່ງທີ່ບົ່ງບອກເຮົາວ່າ ຕໍ່ໃຫ້ຍຸກສະໄຫມຜ່ານໄປເທົ່າໃດ ເຮືອນລາວຊູເສົາກໍ່ຍັງຄົງເປັນສະເຫນ່ ແລະເອກະລັກທາງພູມປັນຍາທີ່ຕົກທອດມາຕັ້ງແຕ່ດົນນານ ແລະຍັງສາມາດເປັນຮູບແບບທີ່ປັບໃຊ້ໃຫ້ເຂົ້າກັບວິຖີຊີວິດປັດຈຸບັນໄດ້ຢ່າງລົງໂຕ.