14 Oct 2014 Business, Works 15 Comments

ອ່ານຫນັງສືທີ່ເຮືອນສວນຫລັງງາມ ກັບ ທ່ານນາງ ດວງເດືອນ ບຸນຍາວົງ

ທ່ານ ນາງດວງເດືອນ ບຸນຍາວົງ
ທ່ານ ນາງດວງເດືອນ ບຸນຍາວົງ

ຄວາມໂສພາ ຂອງດອກເກດ ທີ່ເບັ່ງບານໃນທຸກຍາມ.

ກ່ອນອື່ນຕ້ອງຂໍເປີດຫົວເລື່ອງກ່ອນວ່າ ການທີ່ໄດ້ຮັບກຽດຈາກ ດອກເກດ1 ໃຫ້ລາຍນ໌ເຂົ້າມາຢ້ຽມຢາມເຮືອນສວນ ທີ່ເປັນດັ່ງສະຖານທີ່ສ່ວນຕົວທີ່ສຸດຂອງເພິ່ນ ຖືວ່າເປັນຄວາມພາກພູມໃຈອັນຫາທີ່ປຽບບໍ່ໄດ້ ແກ່ວາລະສານຂອງພວກເຮົາ.

 

ສວນໄຜ່ພັນກໍ ສະຖານທີ່ ທີ່ປົກຄຸມໄປດ້ວຍທໍາມະຊາດສາມັນທຳມະດາແຕ່ພິເສດ ຂອງນັກຂຽນລາງວັນ SEA WRITE AWARD2 ປີ 2006 , ທ່ານນາງ ດວງເດືອນ ບຸນຍາວົງ.

 

ສວນໄຜ່ພັນກໍ ເປັນຊື່ທີ່ຕັ້ງຂຶ້ນຈາກທີ່ມາຂອງປື້ມຂຽນ ຜ້າແພພັນລາຍ, ຈາກບົດຂຽນສູ່ສາຍານາມຂອງສະຖານທີ່ ເກີດເປັນຊື່ ສວນໄຜ່ພັນກໍ, ຄວາມໝາຍຫລັກກໍ່ແມ່ນມາຈາກການທີ່ຕ້ອງການປູກຕົ້ນໄຜ່ ເພື່ອໃຫ້ໄດ້ວັດສະດຸທີ່ສາມາດໃຊ້ງານໄດ້ໃຊ້ງານຈີງ ແລະ ຈຸດປະສົງຫລັກຂອງການສ້າງເຮືອນສວນແຫ່ງນີ້ຂອງ ທ່ານນາງ ດວງເດືອນ ຍັງແມ່ນເພື່ອເປັນສະຖານທີ່ ເພື່ອໃຫ້ຜູ່ທີ່ສົນໃຈໃນການອ່ານ, ການຂຽນແລະ ດ້ານວັດທະນະທຳ ໄດ້ເຂົ້າມາຊົມໃຊ້ພື້ນທີ່ ເພາະໃນຖານທີ່ແຫ່ງນີ້ປະກອບໄປດ້ວຍ ຫ້ອງສະໝຸດແລະພິພະທະພັນຜ້າໄຫມ ທີ່ປຸກຂຶ້ນໃນ Style tropical (ສະຖາປັດໃນເຂດຮ້ອນຊຸ່ມ).

ເຮືອນສວນໄຜ່ພັນກໍ
ເຮືອນສວນໄຜ່ພັນກໍ

8

 

ເຮືອນລາວ ຊູເສົາ,ທີ່ຕື່ມເຕັມດິນຫວ່າງແຫ່ງນີ້ ເປັນເຮືອນພັກສ່ວນຕົວ ທີ່ຖືກອອກແບບໃຫ້ແທດເໝາະກັບສະພາບອາກາດຂອງລາວ ທີ່ເຮົາເອີ້ນວ່າ Tropical house,ເຊິ່ງເປັນຮູບແບບ ເຮືອນລາວພື້ນຖິ່ນ ທີ່ຕອບສະໜອງການນຳໃຊ້ຂອງຄົນລາວມາແຕ່ບູຮານນະການ. ສະຖາປະນິກໄດ້ຄົງຮູບແບບຂອງເຮືອນລາວໄວ້ ແຕ່ອອກແບບໃຫ້ຮ່ວມສະໄໝຂຶ້ນ ເພື່ອໃຫ້ເຂົ້າກັບການດຳລົງຊີວິດທີ່ປ່ຽນໄປຈາກຍຸກເກົ່າ.  ເຊິ່ງສິ່ງນີ້ສະທ້ອນເຖິງຮູບແບບການດຳລົງຊີວິດ ແລະ ບຸກຄະລິກຂອງເຈົ້າຂອງເຮືອນອອກມາຜ່ານສະຖາປັດຕະຍະກຳ ແລະການຕົກແຕ່ງໄດ້ເປັນຢ່າງດີ ວ່າເປັນຜູ່ທີ່ຫລົງໄຫລໃນຄວາມລຽບງ່າຍ ແລະຄວາມສະຫງົບແບບລາວໆ.

11

7

ເຮືອນສວນຕ້ອນຮັບແຂກດ້ວຍຂັ້ນໄດໄມ້ ທີ່ເປັນເອກະລັກທີ່ສຳຄັນຂອງເຮືອນລາວ, ທາງ2ຂ້າງມີໄຫນນໍ້າແລະ ກະບວຍສຳລັບຕັກດື່ມໄດ້ຄືສະໄໝກ່ອນ ເຮັດໃຫ້ເຮືອນຫລັງນີ້ ຍ້ອນອະດີດນຳເຮົາກັບສູ່ວີຖີຊີວິດຂອງຄົນລາວສະໄໝກ່ອນ.

 

ຊານໄມ້ອ້ອມຕົວເຮືອນຍື່ນອອກໄປໃຫ້ເປັນບ່ອນຮັບຊົມທຳມະຊາດ ແລະສວນອ້ອມຮອບ, ສູດອາກາດທີ່ບໍລິສຸດ ພ້ອມກັບອ່ານໜັງສືເທີງຕັ່ງໄມ້ທີ່ປະດັບດ້ວຍໝອນລວດລາຍຜ້າລາວ, ເປັນກິ່ນອາຍຂອງລາວພື້ນເມືອງຖິ່ນທີ່ແທ້ຈິງ ເປັນກິດຈະກຳງ່າຍໆທີ່ໃຫ້ຄວາມສຸກໃຈໄດ້ເຕັມປ່ຽມ.

Lines Style 6

ພາຍໃນຕົວເຮືອນ, ຊຸດເຟີນີເຈີຖືກຕົກແຕ່ງດ້ວຍຜ້າລາວ ເກົ່າແກ່, ລວດລາຍທຳມະດາທີ່ຄຸ້ນຕາສັນສ້າງໃຫ້ພື້ນທີ່ເຕັມໄປດ້ວຍກິ່ນອາຍຂອງຄວາມເປັນລາວ. ຕູ້ມ້ຽນປື້ມທີ່ຕັ້ງຢູ່ໃນທຸກໆມຸມຂອງເຮືອນ ສະແດງໃຫ້ເຫັນເຖິງຄວາມເປັນນັກອ່ານແລະນັກຂຽນຂອງເຈົ້າຂອງເຮືອນ.

 

ຮູບພາບເກົ່າ ທີ່ແຂວນຂ້າງຝາ ເປັນສິ່ງປະດັບໜຶ່ງທີ່ເຮັດໃຫ້ຝາເຮືອນສີຂາວ ມີເລື່ອງລາວ ແລະຄວາມອົບອຸ່ນຂອງຄອບຄົວ ບຸນຍາວົງ.

4

6

3

ສວນອ້ອມຮອບຂຽວອຸ່ມທຸ່ມ ປົກຄຸມດ້ວຍພືດພັນນາໆຊະນິດ ກອດກ້ຽວງ່າໄມ້ສ້າງພາບທີ່ສວຍງາມ. ທັງຕັ້ງໃຈ ແລະບໍ່ຕັ້ງໃຈ ເກີດຄວາມກົມກືນກັບຕົວເຮືອນ ສ້າງເປັນຄວາມຮົ່ມເຢັນໄປທົ່ວບໍລິເວນ.

9 10

ນອກຈາກຈະພາຊົມບ້ານ ແລະບໍລີເວນຂອງສວນແລ້ວ ທ່ານນາງດວງເດືອນ ຍັງໄດ້ມານັ່ງໂອ້ລົມເຖິງເລື່ອງລາວໃນຊີວິດທີ່ຜ່ານມາຂອງເພິ່ນ ພ້ອມກັບເປີດຕູ້ປື້ມ ເບິ່ງຜົນງານພາຍໃຕ້ນາມປາກກາ ດອກເກດ. ໜ້າປື້ມໄດ້ຖືກເປີດໜ້າຕໍ່ໜ້າພ້ອມກັບເລື່ອງເລົ່າຜ່ານສຽງອັນນຸ້ມນວນຂອງຜູ່ຍິງທີ່ໂສພາທັງຮູບຮ່າງແລະແນວຄິດ ສະກິດໃຫ້ເກີດຄວາມສົນໃຈຕໍ່ງານຂີດຂຽນຂອງຄົນລາວ. ຄວາມເປັນກັນເອງທີ່ເພິ່ນໄດ້ມອບໃຫ້ ໄດ້ລົບລ້າງທີ່ຫວ່າງທີ່ຂັ້ນກາງດ້ານຄຸນນະວຸດທິ ອອກໄປເຫລືອແຕ່ກຸ່ມຄົນທີ່ມີຄວາມສົນໃຈໃນສິ່ງດຽວກັນ ໂອ້ລົມແລກປ່ຽນປະສົບການທັງດ້ານຊີວີດ ແລະ ການຂຽນຢ່າງອອກລົດຊາດ, ເປັນບົດຮຽນໃຫ້ເຮົາໄດ້ນຳໄປປັບໃຊ້ໃນຊີວິດປະຈຳວັນ.

13

ໂຕໜັງສືທີ່ຖືກຮ້ອຍຮຽງຂື້ນ ແລະພິມລົງໃນປື້ມ ບໍ່ວ່າເວລາຜ່ານໄປສໍ່າໃດ ເລື່ອງລາວໃນປື້ມເຫລັ້ມນັ້ນໆກໍ່ບໍ່ເຄີຍປ່ຽນໄປ, ເຊັ່ນດຽວກັບເລື່ອງລາວຕ່າງໆທີ່ຖືກຢຸດໄວ້ທີ່ສວນໄຜ່ພັນກໍແຫ່ງນີ້ ບໍ່ວ່າຈະເປັນສະຖາປັດຕະຍະກຳລາວ ແລະ ວິຖີຊີວິດຂອງທ່ານນາງ ດວງເດືອນ ບຸນຍາວົງ.

 

“ ວັດທະນະທຳຄືສາຍທານນໍ້າໄຫລ ບໍ່ວ່າຈະມີທາງຕັນກໍ່ຍັງມີຊ່ອງນ້ອຍໆໃຫ້ນໍ້າໄຫລຜ່ານໄດ້ສະເໝີ ”

2

_________________________________________________________

 

1  ນາມປາກກາຂອງ ທ່ານນາງ ດວງເດືອນ ບຸນຍາວົງ

2 South east Asian writer Awards ລາງວັນວັນນະກຳສ້າງສັນ ດີເດັ່ນແຫ່ງ ອາຊຽນ