ເຮືອນຊົງໂມເດີ້ນ ທີ່ແຝງໄປດ້ວຍຄວາມອົບອຸ່ນ ແລະຄວາມຫມາຍຂອງຄຳວ່າຄອບຄົວ

ນິຍາມຂອງຄຳວ່າ “ເຮືອນ“  ທີ່ສວຍງາມທີ່ສຸດ

ໃນແບບຂອງ ທ່ານ ຄິດຕະພອນ ສຸພາບ

ຜູ້ທີ່ໃຊ້ປະສົບການກວ່າ 10ປີ ຫລໍ່ຫລອມຄວາມຮູ້ເລື່ອງ “ເຮືອນ“

ເພື່ອສ້າງອາຄານ ທີ່ເຕັມປ່ຽມໄປດ້ວຍ ໄອເດຍ ແລະຄວາມຫມາຍຂອງຄອບຄົວ.

ຄວາມ Modern ຄືສິ່ງທີ່ທັກທາຍເຮົາຕັ້ງແຕ່ ກ້າວທຳອິດທີ່ຍ່າງເຂົ້າມາ ຜ່ານຮົ້ວສີຂຽວອຸ່ມທຸ່ມຂອງຕົ້ນໄມ້ ທີ່ຈັດວາງສະຫລັບກັບຝາສີຂາວຂອງເບຕົງ, ຂອບເຂດບໍລິເວນເຮືອນ ຂອງທ່ານ ຄິດຕະພອນ ສຸພາບ. ນັກທຸລະກິດທີ່ຜ່ານປະສົບການ ການການປະກອບກິດຈະການ ມາຫລາກຫລາຍສາຂາ ຕັ້ງແຕ່ອາຍຸ 16ປີ. ເລີ່ມຕັ້ງແຕ່ການເຮັດ ຂາເຂົ້າ-ຂາອອກ, ຂົວທາງ, ໂຮງໂມ້ຫີນ, ກະເສດ ຈົນມາຮອດການກໍ່ຕັ້ງບໍລິສັດ ຮັບເຫມົາກໍ່ສ້າງ ແລະ ຮູ້ສຶກວ່າ ຈະລົງຫລັກປັກຖານກັບທຸລະກິດນີ້ ເປັນການຖາວອນ ເພາະມີຄວາມມັກ ແລະຫລົງໄຫລໃນສາດການອອກແບບ ອາຄານ ແລະການກໍ່ສ້າງອາຄານ, ນັ້ນ ເຮັດໃຫ້ເຮົາບໍ່ແປກໃຈວ່າ ເປັນຫຍັງ ເຮືອນຢູ່ ຂອງ ທ່ານຄິດຕະພອນ ສຸພາບ ຈະຖືກອອກແບບ ແລະກໍ່ສ້າງອອກມາໄດ້ສວຍງາມ ແລະເຕັມໄປດ້ວຍຄວາມເອົາໃຈໃສ່ໃນການເລືອກວັດສະດຸໄດ້ເປັນຢ່າງດີ.

 

ແນວຄວາມຄິດຫລັກຂອງການອອກແບບເຮືອນຫລັງນີ້ ແມ່ນ ຄວາມເປັນຮູບແບບໂມເດີ້ນ ເປັນຄວາມມັກສ່ວນຕົວ ຂອງ ທ່ານຄິດຕະພອນ ເອງກັບ ພັນລະຍາ, ເມື່ອແນວຄວາມຄິດລົງຕົວ ກໍ່ເປັນຫນ້າທີ່ຂອງສະຖາປະນິກ ທີ່ເຂົ້າມາອອກແບບ Function ແລະຄວາມສວຍງາມດ້ານສະຖາປັດຕະຍະກຳໃຫ້. ແຕ່ວ່າການເລືອກວັດສະດຸ ແລະງານກໍ່ສ້າງຕ່າງໆແມ່ນທາງ ທາງຄິດຕະພອນ ເປັນຜູ້ຄວບຄຸມເອງທັງໝົດ.

          ຖ້າຈະຖາມວ່າ ຫ້ອງໃດຫລືພື້ນທີ່ໃດ ທີ່ເປັນຕາຢູ່ທີ່ສຸດໃນບໍລິເວນເຮືອນຫລັງນີ້ ເຮົາເອງອາດຈະຕອບບໍ່ໄດ້,ດ້ວຍຄວາມທີ່ພື້ນທີ່ຂອງທຸກຕາລາງແມັດນັ້ນ ມີຄວາມດຶງດູດຕາມການໃຊ້ງານຂອງຕົວມັນເອງ.

          ເລີ່ມຈາກສວນຫນ້າບ້ານ ທີ່ມີພື້ນທີ່ສຳລັບການລວມໂຕຂອງສະມາຊິກທັງໝົດຂອງຄອບຄົວ ແລະຍັງເປັນພື້ນທີ່ຮັບແຂກແບບ Outdoor, ຕ້ອນຮັບດ້ວຍໂຕະໄມ້ຂະຫນາດຍາວສຳລັບບໍ່ຕຳ່ກວ່າ 15 ຄົນ. ພື້ນທີ່ໂລ່ງນີ້ ບໍ່ມີແນວມຸງ ແຕ່ເປັນພື້ນທີ່ທີ່ຖືກປົກຄຸມດ້ວຍຄານໄມ້ ຮູບຊົງ4ຫລ່ຽມທັນສະໄຫມ ທີ່ເປັນດິ້ວພາດຈາກຕົວເຮືອນໃຫຍ່ ໃສ່ຝາອີກເບື້ອງຫນຶ່ງ ນັ້ນເປັນລູກຫລີ້ນທີ່ເຈົ້າຂອງເຮືອນເລືອກໃຊ້ເພື່ອໃຫ້ພື້ນທີ່ພາຍນອກມີຄວາມເຊື່ອມໂຍງກັບອາຄານຫລັກ.

ສວນສີຂຽວ ອ້ອມ ສະລອຍນຳ້ ເປັນຫນຶ່ງຈຸດພັກສາຍຕາ ເມື່ອຕ້ອງການພັກຜ່ອນ ສຳຜັດບັນຍາກາດ ຜ່ອນຄາຍ ດ້ວຍສາຍນຳ້ ແລະສີຂຽວຂອງຕົ້ນໄມ້ ທີ່ ທ່ານຄິດຕະພອນ ແລະຄອບຄົວເລືອກສັນມາປູກເອງກັບມື. ເຖິງວ່າ ພື້ນທີ່ຫນ້າບ້ານ ທີ່ສ້າງເປັນສວນຈະເປັນພື້ນທີ່ບໍ່ກວ້າງຫລາຍ ແຕ່ສະຖາປະນິກສາມາດຈັດສັນ ອົງປະກອບ ທັງ ສະລອຍນຳ້, ສວນຫຍ້າ ແລະພື້ນທີ່ນັ່ງຫລີ້ນອອກມາໄດ້ຢ່າງລົງໂຕ.ຄວາມພິເສດແມ່ນທາງກາງສະນຳ້ ຖືກເຈາະເວັ້ນໃຫ້ເປັນໂຕະຫີນມົນທີ່ຫລຸບລົງໄປສາມາດເປັນບ່ອນນັ່ງສັງສັນທ່າມກາງສະນຳ້ ແລະແສງໄຟສີສົ້ມສະຫລົວໃນຍາມກາງຄືນໄດ້ ໃນບັນຍາກາດລະດັບ 5ດາວກັນເລີຍ.

          “ພື້ນທີ່ຫນ້າບ້ານ ເປັນພື້ນທີ່ທີ່ເຮົາໃຊ້ເວລາຢູ່ຫລາຍທີ່ສຸດ, ເຮົາມັກບັນຍາກາດ ທີ່ ພໍ່ ແມ່ ລູກ ມານັ່ງລວມກັນ ກິນເຂົ້າ ສົນທະນາ ທ່າມກາງບັນຍາກາດສວນ ທີ່ເຮົາສ້າງຂຶ້ນເອງ ແລະເຮົາຮູ້ສຶກວ່າ ນັ້ນແມ່ນ ບັນຍາກາດຂອງ ເຮືອນແທ້ໆ ຫລາຍກວ່າ ທີ່ຈະໄປຢູ່ຫ້ອງໃຜຫ້ອງລາວ”

ຮູບດ້ານຫນ້າຍາວ ຝາສີຂາວ ທີ່ມີປ່ອງເປີດແກ້ວ ຕະຫລອດແນວຂອງ ເຮືອນ ທີ່ຕັ້ງຂະໜານກັບສະລອຍນຳ້ ໂປ່ງໃສຈົນເຮັດໃຫ້ເຮົາແນມເຫັນບັນຍາກາດພາຍໃນອາຄານ ຈົນຕ້ອງກ້າວເຂົ້າໄປຢ້ຽມຊົມ. ເຮົາຍ່າງຜ່ານພື້ນຫີນ ທຳມະຊາດ ວັດສະດຸຊັ້ນດີເຂົ້າໄປໃນໂຕເຮືອນ ເຫັນໄດ້ເຖິງພື້ນທີ່ຂອງຊັ້ນ1 ທີ່ສູງໂລ່ງຈົນເຖິງເພດານຊັ້ນ2 ເຮັດໃຫ້ເຮືອນ ໂມເດີ້ນຫລັງນີ້ ເບີ່ງໂອ່ໂຖງເຂົ້າໄປຕື່ມ. ໂຊຟາຮັບແຂກທີ່ຖືກຈັດສັນໄວ້ທາງກາງ ເປັນພື້ນທີ່ທີ່ສະມາຊິກຂອງຄອບຄົວມັກມາໃຊ້ຊີວິດຢູ່ ເປັນອັນດັບ2ຮອງຈາກໂຕະໄມ້ຫນ້າບ້ານ. ກວາດສາຍຕາຂື້ນໄປ ເຫັນລະບຽງຮາວແກ້ວອ້ອມເຮືອນ ເປັນທາງຍ່າງ ທີ່ເຊື່ອມເອົາທັດສະນີຍະພາບ ແລະສາຍຕາຂອງພື້ນທີ່ຊັ້ນ1 ແລະຊັ້ນ2 ເຂົ້າໄວ້ນຳກັນ. ເວລາທີ່ຍ່າງຢູ່ທາງຍ່າງຊັ້ນ2 ເພື່ອຈະໄປຍັງຫ້ອງຕ່າງໆ ຫລືຂື້ນ-ລົງຂັ້ນໄດ້, ຝາແກ້ວດ້ານຫນ້າຈະເຮັດໃຫ້ເຮົາເຫັນບັນຍາກາດສວນທີ່ຢຸ່ທາງລຸ່ມໄດ້ເຕັມໆຕາ.

          ສີ່ງທີ່ເຮັດໄດ້ ນອກຈາກຄວາມສວຍງາມຂອງເຮືອນຫລັງນີ້ ແມ່ນຄວາມລົງໂຕຂອງພືຶ້ນທີຕ່າງໆ ທີ່ຖືກສ້າງມາເພື່ອການນຳໃຊ້ຂອງຄົນໃນຄອບຄົວຢ່າງແທ້ຈິງ ຄືກັບນີຍາມຂອງຄຳວ່າ ເຮືອນ ທີ່ທ່ານ ຄິດຕະພອນ ແລະພັນລະຍາ ໄດ້ບອກກັບເຮົາວ່າ: ແຕ່ລະຄົນໃນຄອບຄົວ, ຕ່າງຄົນ ຕ່າງມີຫນ້າທີ່ຂອງຕົນເອງ, ເຮົາເປັນພໍ່ ມີອາຊີບ ເປັນນັກທຸລະກິດ ເຮົາກໍ່ອອກໄປເຮັດຫນ້າທີ່ຂອງເຮົາ. ຜູ້ເປັນເມຍ ຢູ່ບ້ານ ມີຫນ້າທີ່ເບີ່ງແຍງດູແລ ເຮືອນ, ຖານະ ພໍ່ ແລະແມ່ ເຮົາມີຫນ້າທີ່ເບິ່ງແຍງໃຫ້ຄວາມອົບອຸ່ນລູກ ຖ້າຕ່າງຄົນຕ່າງເມົາແຕ່ເຮັດວຽກ ກໍ່ຈະບໍ່ມີເວລາໃຫ້ຄອບຄົວ ເພາະສະນັ້ນ ເຮືອນ ແມ່ນສິ່ງທີ່ເຮົາສ້າງເພື່ອຄວາມສຸກ, ຄືສະຖານທີ່ທີ່ຍັງຫລົບຫລີກຈາກຄວາມເມື່ອຍທຸກຢ່າງແລ້ວກັບມາ ເຮືອນ, ມີຄົນໃນຄອບຄົວລໍຖ້າ, ມີອາຫານ, ມີທຸກຢ່າງພ້ອມ, ນ້ັນຄື ບ້ານ ຫລື ເຮືອນ ທີ່ເຮົາຕ້ອງສ້າງເອງກັບມື ບໍ່ແມ່ນພຽງແຕ່ສິ່ງກໍ່ສ້າງ ແຕ່2ມື ທີ່ສ້າງ ຄວາມສຸກ ໃນເຮືອນຂອງເຮົາ.