ຊີວິດລິຂິດເອງ : ດວງດາວທີ່ບໍ່ລໍຖ້າໃຫ້ລິຂິດຟ້າມາກໍານົດ

ບົດລະຄອນເພງ ຊີວິດລິຂິດເອງ ບົດເພງໂດຍ ເບີດ ທົງໄຊ ທີ່ເລົ່າເລື່ອງລາວຄວາມເປັນມາກ່ອນຈະມາເປັນ ກາເຟດາວ ໃນປັດຈຸບັນ ຖືວ່າເປັນການສະແດງລະຄອນເພງຊຸດພິເສດ ໃນຄໍ່າຄືນຂອງວັນທີ 8 ສິງຫາ 2018 ທີ່ຜ່ານມາ ເນື່ອງໃນໂອກາດຕ້ອນຮັບ ແລະ ຂອບໃຈຕົວແທນຈໍາຫນ່າຍ ທີ່ທາງກຸ່ມບໍລິສັດ ດາວເຮືອງ ຈຳກັດ ໄດ້ຈັດຂຶ້ນ.

ນອກຈາກຈະເປັນການເພີ່ມສີສັນໃຫ້ແກ່ງານລ້ຽງແລ້ວ ບົດລະຄອນດັ່ງກ່າວໄດ້ຖ່າຍທອດເລື່ອງລາວເສັ້ນທາງເດີນທີ່ຍາກລໍາບາກຂອງຜູ້ກໍ່ຕັ້ງບໍລິສັດ ທ່ານນາງເລືອງ ລິດດັງ ຜ່ານຕົວລະຄອນນັກສະແດງຊື່ດັງ ທີ່ສື່ອາລົມອອກມາໄດ້ຢ່າງເລິກເຊິ່ງ ແລະ ເຊື່ອວ່າຈະເປັນທີ່ປະທັບໃຈ ທັງເປັນທີ່ຈົດຈໍາໃນຄຸນຄ່າຂອງ ກາເຟດາວ ສໍາລັບບັນດາແຂກຜູ້ຊົມໄດ້ເປັນຢ່າງດີ.

“ເລື່ອງລາວທັງຫມົດໄດ້ເລີ່ມຕົ້ນຈາກ ແມ່ຂອງຂ້ອຍ” ປະໂຫຍກເປີດເລື່ອງທໍາອິດໄດ້ດັງຂຶ້ນ ຈາກສຽງຫວານໆຈາກນັກສະແດງສາວ ທີ່ຮັບບົດເປັນຄາຣອລ ລິດດັງ ຜູ້ເປັນລູກສາວກົກຂອງ ແມ່ເລືອງ ລິດດັງ.

ບົົດເລື່ອງໄດ້ເລົ່າຍ້ອນເວລາກັບໄປ ໃຫ້ເຫັນພາບຂອງຊີວິດທີ່ສູ້ຊົນເລີ່ມຕົ້ນດ້ວຍສອງມືເປົ່າ ຕັ້ງແຕ່ສະໄຫມທີ່ແມ່ເລືອງຍັງນ້ອຍ ພວມເລາະຂາຍຫມາກກ້ວຍປີ້ງຕາມຕະຫລາດເພື່ອຫາເງິນລ້ຽງນ້ອງອີກ 8 ຄົນ ບາງມື້ຂາຍດີກໍໄດ້ກັບບ້ານໄວ ບາງມື້ບໍ່ໄດ້ຂາຍກໍໄດ້ອົດຢູ່ອົດກິນ.

ຄວາມທຸກຍາກລໍາບາກເຖິງວ່າຈະເປັນອຸປະສັກ ໃນຂະນະດຽວກັນກໍປຽບເຫມືອນດັ່ງແຮງພັກດັນທີ່ເຮັດໃຫ້ ແມ່ເລືອງ ບໍ່ຍອມແພ້ຕໍ່ໂຊກຊະຕາ ແລະ ອົດທົນສູ້ເປັນທີ່ສຸດເພື່ອຊີວິດການເປັນຢູ່ທີ່ດີຂຶ້ນ. ເນື່ອງຈາກວ່າບໍ່ມີໂອກາດໄດ້ສຶກສາຮໍ່າຮຽນ ການໄດ້ຟັງຄໍາສອນທີ່ເລັດລອດອອກມາຈາກໂບດຄຸນແມ່ ໃນຂະນະທີ່ຂາຍກະແລ້ມ ຢູ່ໃກ້ໆນັ້ນ ເປັນຫົນທາງຫນຶ່ງທີ່ແມ່ເລືອງຈະສາມາດຊຶມຊັບເອົາຄວາມຮູ້ ສົມທົບກັບປະສົບການຄ້າຂາຍທີ່ໄດ້ເລີ່ມເກັບກ່ຽວມາແຕ່ນ້ອຍ ເວລາຜ່ານໄປ ການຄ້າຂາຍຂອງແມ່ເລືອງກໍໄດ້ຂະຫຍາຍເຕີບໃຫຍ່ຂຶ້ນຈົນເປັນທຸລະກິດທີ່ຫມັ້ນຄົງພາຍໃຕ້ຄວາມເອື້ອເຟື້ອເພື່ອແຜ່ໃຫ້ແກ່ບັນດາປະຊາຊົນອ້ອມຂ້າງຢູ່ສະເຫມີ ດ້ວຍຄວາມເຊື່ອທີ່ວ່າ “ຍິ່ງໃຫ້ໄປຫລາຍເທົ່າໃດກໍຍິ່ງໄດ້ຫລາຍເທົ່ານັ້ນ”

ໃນບົດເລື່ອງຍັງມີການແຊກຊ້ອນ ເລື່ອງລາວການພົບກັນທີ່ຫນ້າຮັກຂອງ ແມ່ເລືອງ ແລະ ດຣ ຫາວ ຜູ້ເປັນຄູ່ຊີວິດໃນປັັດຈຸບັນ. ຄວາມມີນໍ້າໃຈ, ການເຫັນຄຸນຄ່າຂອງການໃຫ້ ແລະ ຄວາມທໍາມະດາທີ່ສະທ້ອນວິຖີຊີວິດທີ່ລຽບງ່າຍຂອງທັງສອງ ເປັນສະເຫນ່ທີ່ດຶງດູດໃຫ້ໄດ້ມາຮ່ວມເດີນໃນເສັ້ນທາງເສັ້ນດຽວກັນ. ການລົງທຶນເຮັດສວນກາເຟ ໂດຍທີ່ທັງສອງບໍ່ໄດ້ມີຄວາມຮູ້ ຫລື ປະສົບການໃນດ້ານນີ້ມາກ່ອນ ເປັນການຕັດສິນໃຈທີ່ມີຄວາມສ່ຽງຫລາຍ ແຕ່ແມ່ເລືອງກໍຍັງຢືນຢັນວ່າ “ໃນເມື່ອເຮົາບໍ່ຮູ້ເຮັດ ເຮົາບໍ່ເຄີຍເຮັດມາກ່ອນ ເຮົາກໍຕ້ອງໄດ້ຮຽນຮູ້ເອົາ”

ດ້ວຍຄວາມເປັນດິນຂອງພູເຂົາໄຟເກົ່າທີ່ມອດດັບໄປແລ້ວຂອງເຂດພູພຽງບໍລະເວນນີ້ ຈຶ່ງເປັນເຂດດິນທີ່ມີຄວາມເຫມາະສົມທີ່ສຸດ ທັງໃນດ້ານສະພາບພູມສາດທີ່ສູງ ປາສະຈາກແມງໄມ້ມາລົບກວນ ແລະ ພູມອາກາດທີ່ຊຸ່ມເຢັນຕະຫລອດປີ ຕົ້ນກາເຟທີ່ປູກໃນເຂດນີ້ ຈະສາມາດໃຫ້ເມັດກາເຟທີ່ສະອາດ, ຄຸນນະພາບດີ ແລະ ແຊບທີ່ສຸດ.

ໃນຂະນະທີ່ ທຸກຄົນຕັ້ງຫນ້າຕັ້ງຕານັບມື້ຄອຍຖ້າຍາມທີ່ຈະເກັບກ່ຽວເອົາເມັດກາເຟຊຸດທໍາອິດ ສິ່ງທີ່ບໍ່ໄດ້ຄາດຝັນກໍເກີດຂຶ້ນ ນັ້ນກໍຄືພາຍຸຝົນເກືອ ແລະ ອາກາດທີ່ຫນາວຈັດໄດ້ເຂົ້າມາປົກຄຸມເຂດພູພຽງບໍລະເວນ, ສວນກາເຟທີ່ມາຈາກເຫື່ອກາຍແຮງໃຈຂອງຊາວສວນ ແລະ ຄວາມຕັ້ງໃຈຂອງແມ່ເລືອງເປັນເວລາຫລາຍປີ ໄດ້ຖືກທໍາລາຍໄປຫລາຍກວ່າເຄິ່ງພາຍໃນພິບຕາ. ເຫດການທີ່ເກີດຂຶ້ນນັ້ນ ເປັນບົດຮຽນອັນສໍາຄັນທີ່ເຮັດໃຫ້ແມ່ເລືອງໄດ້ຮູ້ວ່າ ອຳນາດຂອງທໍາມະຊາດມີອິດທິພົນຫລາຍ ແຕ່ຖ້າຫາກແມ່ເລືອງຍອມແພ້ຕໍ່ໂຊກຊະຕາ ແລະ ໂທດຟ້າລິຂິດໄປຕັ້ງແຕ່ມື້ນັ້ນ ກໍຄົງຈະບໍ່ມີ ດາວ ໃນມື້ນີ້.

ກວ່າຈະກາຍມາເປັນ ດາວ ບໍ່ແມ່ນຍ້ອນຄວາມບັງເອີນ ຫລື ມີພົມແດງປູມາຕະຫລອດເສັ້ນທາງ ຫາກເປັນຍ້ອນການບຸກບືນຝ່າຟັນຂອງແມ່ເລືອງ ທີ່ອົດທົນກໍານົດລິຂິດຊີວິດຂອງຕົນເອງດ້ວຍຄວາມຍາກລໍາບາກ ແລະ ພົບອຸປະສັກຮ້ອຍແປດພັນຢ່າງທີ່ຂວາງຫນ້າມາຕະຫລອດທາງ. ຄວາມຫມາຍຂອງຊື່ ດາວ ໃນທີ່ນີ້ຈຶ່ງມີຄວາມຫມາຍຢາກໃຫ້ເປັນ ດາວ ທີ່ສ່ອງແສງແຈ້ງຮຸ່ງເຮືອງເລື້ອຍໄປ ບໍ່ວ່າໃນຍາມທີ່ທ້ອງຟ້າມືດມິດ ເປັນດວງດາວທີ່ບໍ່ລໍຖ້າໃຫ້ລິຂິດຟ້າມາກໍານົດ.

ດຣ ຫາວ, ທ່ານນາງເລືອງ ລິດດັງ ແລະ ລູກສາວ ເຄຣອລ ລິດດັງໃນຊີວິດຈິງ