Ole Viravong Scovil Art Until Death – ຊີວິດທີ່ຂາດສິລະປະບໍ່ໄດ້

ການເປັນສິລະປິນດ່ຽວມັນຍາກ ເປັນປະໂຫຍກທີ່ອອກມາຈາກປາກຂອງສິລະປິນດ່ຽວຍິງຊື່ດັງຂອງລາວ ໂອເລ້ ວິຣະວົງ ສະໂຄວິວ (Ole Viravong Scovil) ໄດ້ບອກກັບພວກເຮົາທີມງານລາຍນ໌, ໂອເລ້ມີຄວາມຄິດແບບນັ້ນວ່າມັນຄົງຈະຍາກເກີນໄປ ແລະ ໄດ້ໄປລອງເຮັດວຽກອື່ນ. ອາຊີບໃນໄລຍະທຳອິດທີ່ລາວຮຽນຈົບແມ່ນເປັນຜູ້ຊ່ວຍຮ້ານຂາຍເຄື່ອງຂຽນ, ແຕ້ມປ້າຍ ແລະ ເຮັດທຸກໆຢ່າງທີ່ລາວສາມາດເຮັດໄດ້ເຊັ່ນ ຊ່າງແຕ່ງໜ້າ, ຊ່າງຖ່າຍຮູບ, ນັກເຕັ້ນ ພ້ອມທັງຍັງເຄີຍເຮັດວຽກກັບ Volk Magazine Thailand ວາລະສານແຟຊັນຊື່ດັງໃນປະເທດໄທ ຈົນຄັ້ງໜຶ່ງເຄີຍມີຄວາມຄິດວ່າຢາກຈະເອົາດີທາງດ້ານນີ້ ແຕ່ມັນກໍເປັນຄືດັ່ງອາຊີບທີ່ເຄີຍເຮັດຜ່ານມາ ໂອເລ້ເຮັດໄດ້ພຽງໄລຍະໜຶ່ງ ກໍຄົ້ນພົບວ່າ ເຮົາເຮັດໄດ້ ແຕ່ມັນບໍ່ແມ່ນເຮົາແທ້ໆ ແລ້ວສິ່ງໃດທີ່ເຮັດໃຫ້ຮູ້ວ່າເສັ້ນທາງສິລະປິນນີ້ມັນແມ່ນຕົວຕົນເຮົາແລ້ວ ພວກເຮົາຖາມດ້ວຍຄວາມສົງໄສ, ສິ້ນສຸດຄຳຖາມໂອເລ້ຍິ້ມແລ້ວກໍຕອບເຮົາທັນທີວ່າ ເພາະວ່າຄວາມມັກ, ມັກໃນລະດັບທີ່ເກີນຮ້ອຍ ຄືກັບວ່າເປັນຢາບຳບັດທີ່ຂາດບໍ່ໄດ້ເລີຍໃນຊີວິດ ເຖິງວ່າຈະເຮັດອາຊີບອື່ນມາຫລາຍຮູບແບບ ແຕ່ບໍ່ມີໄລຍະເວລາໃດທີ່ສາມາດປະຖິ້ມການແຕ້ມຮູບໄດ້ເລີຍ…